Rusiyalı məmura hücum - Moskva və Paris arasında gərginlik

Rusiyanın "Rosoboronekspert" şirkətinin rəhbəri Sergey Kornev Fransada hücuma məruz qalıb.

Teleqraf.com xarici mediaya istinadla xəbər verir ki, hadisə Parisdə keçirilən Le-Burje aviasərgisində baş verib.

Oğrular sərgidən çıxaraq, avtomobilinə əyləşən Kornevi ölümlə hədələyib və onun çantasını oğurlayıblar.

Məlumatlara görə, oğrulardan biri şirkət rəhbərinə xəsarət yetirib. O, hadisədən dərhal sonra xəstəxanaya çatdırılıb.

Paris polisi hadisə ilə əlaqədar 4 nəfərin saxlanıldığını bildirib.

Hadisədən sonra Fransanın Moskvadakı səfiri Rusiya Xarici İşlər Nazirliyinə çağırılıb. Səfirə etiraz notası təqdim edilib. Notada Fransa polisinin bu ölkədə fəaliyyət göstərən və səfər edən rusiyalıların təhlükəsizliyinin gücləndirməsi tələb edilib.