13 Oktyabr 11:20
6 922

Prezident İlham Əliyevin oktyabrın 12-də imzaladığı sərəncamla energetika naziri təyin edilən Pərviz Oqtay oğlu Şahbazov mərhum Qəşəm Şahbazovun nəvəsidir.

Teleqraf.com xəbər verir ki, Q.Şahbazov 1902-ci ildə Qəmərli qəzasının Qarahəmzəli kəndində dünyaya gəlib. Gəncə Kənd Təsərrüfatı İnstitutunu və Bakı Ali Partiya Məktəbini bitirmiş Q.Şahbazov Qərbi Azərbaycanın Basarkeçər rayonunda su idarəsinin rəisi, “Sovet Ermənistanı” qəzetinin kənd təsərrüfatı şöbəsinin müdiri, Böyük Vətən müharibəsi illərində Vedi, Qarabağlar, Zəngibasar (Masis) rayonlarında birinci və ikinci katib vəzifələrində çalışıb. Bundan əvvəl isə Ermənistan Kommunist Partiyası Mərkəzi Komitəsinin şöbə müdirinin müavini işləyib.

Zəngibasar rayonunun son birinci katibi (1947-1950-ci illərdə) də Q.Şahbazov olub. Onun birinci katib olduğu dövrdə rayonda Azərbaycan dili dövlət dili idi. Belə ki, onun rəhbərliyi dövründə Zəngibasarda bütün rəsmi sənədlər, o cümlədən partiya komitəsinin sənədləri əvvəl Azərbaycan dilində, sonra isə ermənicə yazılırdı. Q.Şahbazov 1989-cu ildə Bakıda vəfat edib.


Müəllif: Səxavət