22 Avqust 2014 16:31

Müdafiə naziri Zakir Həsənovun təşəbbüsü ilə nazirliyin zabiti polkovnik Abdulla Qurbani Belarus və Ukraynaya ezam olunub.

Nazirlikdən Teleqraf.com-a verilən məlumata görə, A.Qurbani Belarus respublikasının Slutsk şəhərində olub, Azərbaycannın suverenliyi və ərazi bütövlüyü, dinc əhalinin təhlükəsizliyinin təmin edilməsində göstərdiyi şəxsi igidlik və rəşadətə görə Azərbaycanın Milli Qəhrəmanı adına layiq görülmüş mayor Anatoli Nikolayeviç Davidoviçin ailəsinə baş çəkib.

Milli Qəhrəmanın ailəsinə Azərbaycanın müdafiə nazirinin salamlarını və hədiyyəsini təqdim etdikdən sonra ölkəmizin Belarusdakı səfirliyi, Belarusdakı Azərbaycan İcmaları Konqresi, Slutsk şəhəri icra komitəsinin nümayəndələrinin iştirakı ilə şəhidin məzarı önündə anma mərasimi keçirilib.

Mərasimdə Milli Qəhrəmanın məzarı önünə Azərbaycanın müdafiə naziri adından əklil qoyulub və ölümündən sonra onun təltif edildiyi "Qızıl Ulduz" medalı şəhidin anasına təqdim olunub. Məzarüstü abidəyə "Azərbaycan Milli Qəhrəmanı" sözləri yazılmış və səkkizguşəli ulduz həkk olunmuş mərmər xatirə lövhəsi vurulub.

Milli Qəhrəmanın anası Klavdiya Andreyevna, Slutsk şəhəri icra komitəsinin nümayəndəsi Larisa Georgiyevna və digər çıxış edənlər bu xeyirxah və vətənpərvər təşəbbüsə görə Prezident İlham Əliyevə və Müdafiə Nazirliyinin rəhbərliyinə minnətdarlıqlarını bildiriblər.

Tədbir Belarusun kütləvi informasiya vasitələrində geniş işıqlandırılıb.

Sabah isə polkovnik A.Qurbani Ukraynanın Xarkov vilayətinin Zimiyov şəhərində dünyaya gəlmiş, Ermənistan-Azərbaycan, Dağlıq Qarabağ münaqişəsində şəhid olmuş cəsur təyyarəçi Ruslan Aleksandroviç Polovinkanın məzarını ziyarət edərək Müdafiə Nazirliyi adından əklil qoyacaq və ölümündən sonra təltif edildiyi "Qızıl Ulduz" medalını 22 ildən sonra Azərbaycanın Milli Qəhrəmanının ailəsinə təqdim edəcəkdir.

BƏXTİYAR


Müəllif:
Загрузка...