27 Fevral 2015 17:34

Bakı şəhəri 118 nömrəli tam orta məktəbdə 19 yanvar 2015-ci il tarixində baş vermiş hadisə ilə bağlı Təhsil Nazirliyinin 21 yanvar 2015-ci il tarixli 37 nömrəli əmrinə əsasən, həmin təhsil müəssisəsinin fəaliyyətinin araşdırılması başa çatıb.

Təhsil Nazirliyi və Suraxanı Rayon İcra Hakimiyyəti nümayəndələrinin birgə apardığı araşdırma zamanı məktəbin fəaliyyətinin “Təhsil haqqında” Azərbaycan Respublikasının Qanununa, mövcud normativ sənədlərin tələblərinə uyğunluğu, idarəetmənin təşkili, təlim-tərbiyə prosesinə nəzarət, fənlərin tədrisi və digər aidiyyəti məsələlərə aydınlıq gətirilib.

Qeyd edək ki, araşdırma dövründə məktəbin direktoru Qardaşxan Səlimov Təhsil Nazirliyi tərəfindən vəzifəsinin icrasından kənarlaşdırılıb ə təhsil müəssisəsinin idarə olunması Bakı Şəhəri üzrə Təhsil İdarəsinin (BŞTİ) əməkdaşına həvalə edilib.

BŞTİ-dənTeleqraf.com-a verilən məlumata görə, araşdırma nəticəsində məktəbdəki tədris prosesinin təşkilinin ümumən qənaətbəxş olduğu və şagirdlərin davamiyyətinin, müəllimlərin peşəkarlıq səviyyəsinin Bakı şəhəri üzrə orta göstəricilərə uyğunluğu məlum olmuşdur. Eyni zamanda, məktəb üzrə təhsilin keyfiyyət göstəricilərinin təhlili nəticəsində ildən-ilə təhsilalanların nailiyyətlərinin (məktəb buraxılış imtahanları və ali təhsil müəssisələrinə qəbul imtahanları üzrə) davamlı müsbət dinamikası müəyyənləşdirilib.

Hadisənin ilkin səbəbinin məktəbin tarix müəlliminin xəstəliyi ilə əlaqədar direktorun şifahi icazəsi əsasında dərsburaxma hallarına yol verilməsi və buraxılan dərslərin əvəz olunmaması göstərildiyindən, araşdırma zamanı 2014/2015-ci tədris ilində müxtəlif səbəblərdən bütün dərsburaxma halları araşdırılıb. Buraxılan dərslərin əksər hissəsinin ixtisaslı müəllimlər tərəfindən, bir qisminin isə qeyri-ixtisaslı pedaqoji kadrlar tərəfindən əvəz edilməsi (məsələn, hadisəyə ilkin səbəb olan, tarix müəlliməsinin hamiləliyi ilə əlaqədar həqiqətən dərsləri buraxdığı, və həmin dərslərin biologiya və riyaziyyat ixtisası olan pedaqoji kadrlar tərəfindən əvəz olunub) və ya boş keçməsi halları müəyyən edilib.

Komissiya araşdırılmış bütün məsələlərin nəticələrini nəzərə alaraq, məktəbin direktoru Qardaşxan Səlimovun intizam məsuliyyətə cəlb olunaraq, iş yerinin dəyişdirilməsi haqqında qərar qəbul edilib.
Növbəti üç ay ərzində məktəbin idarə edilməsi Nizaməddin Ağcayevə həvalə olunub.

Digər məsələlərə hüquqi qiymət verilməsi məqsədilə toplanılmış materiallar aidiyyəti qurumlara göndərilib.

Xatırladaq ki, sözügedən məktəbin qarşısında yanvarın 19-da səhər saatlarında Hövsan qəsəbəsi sakinləri aksiya keçirmişdilər. Buna səbəb məktəb direktorunun şagirdlərdən bir neçəsi ilə kobud davranışı olmuşdu. Aksiya zamanı Elmar Əliyev adlı şəxs həyəcanlanaraq dünyasını dəyişmişdi.

SEVİL


Müəllif: