Rusiya AES üçün Ermənistana 4,5 milyard dollar vəsait ayıracaq

Rusiya Ermənistana növbəti iri həcmli yardım edəcək.

Alınan məlumata görə Ermənistanın təbii sərvətlər və energetika naziri Yervand Zaxaryan Metsamor Atom Elektrik Stansiyasının səhmdarları ilə görüş zamanı yeni AES-in tikintisi üçün Rusiyanın maliyyə yardımı edəcəyini açıqlayıb:

“Rusiya AES-in yeni enerji blokunun tikintisi və lazımi avadanlıqlarla təmin olunması üçün 4,5 milyard dollar vəsait ayıracaq”.

Nazir onu da əlavə edib ki, yeni enerji bloku 1000 MBt gücündə olacaq və 5 milyard dollara başa gələcək. Tikinti işlərinin 2018-ci ildə başlanması gözlənilir. Yeni enerji blokunun istifadəyə verilməsinə qədər isə Metsamor AES-inin istifadə müddəti artıq bitmiş köhnə enerji bloku modernləşdiriləcək.

Qeyd edək ki, Yerevanın 30 kilometrliyində yerləşən Metsamor Atom Elektrik Stansiyası 1980-ci ildə istifadəyə verilib. AES-in istifadə müddəti 2010-cu ildə başa çatsa da, onun istismarı hələ də davam edir. Region ölkələrinə böyük təhlükə törədən stansiyasının bağlanması ilə bağlı Azərbaycan və Türkiyə bir neçə dəfə beynəlxalq təşkilatlar qarşısında məsələ qaldırıb

/modern.az/