"Nizami Gəncəvi" Sarayevoda: Balkanların Avropa gələcəyi

Nizami Gəncəvi Beynəlxalq Mərkəzi noyabrın 20-də Bosniya və Herseqovinanın paytaxtı Sarayevoda “Balkanların Avropa gələcəyi” mövzusunda konfrans keçirəcək.

Diasporla İş üzrə Dövlət Komitəsindən Teleqraf.com-a verilən məlumata görə, konfransda Avropaya inteqrasiya ilə bağlı mövcud problemlər və onların həll yolları, Avropa İttifaqının gələcəyi, üzv ölkələr, o cümlədən Balkanlar üçün təhlükəsizliyin təminatı, sosial-iqtisadi inkişaf perspektivləri, əməkdaşlığın gücləndirilməsi və s. mövzularda müzakirələr aparılacaq.

Nizami Gəncəvi Beynəlxalq Mərkəzinin İdarə Heyətinin üzvü, Bosniya və Herseqovinanın sabiq Baş naziri Zlatko Laqumdzijanın rəhbərliyi ilə təşkil olunan toplantıda Balkan ölkələrinin, digər Avropa dövlətlərinin və ABŞ-ın tanınmış siyasətçiləri, nüfuzlu beynəlxalq təşkilatların sabiq rəhbərləri iştirak edəcək. Konfransda Çex Respublikasının sabiq Baş naziri Jan Fişer, Albaniyanin eks-prezidenti Sali Berişa, Makedoniyanin keçmiş dövlət və hökumət başçısı olmuş Branko Crvenkovski, Dunya Bankının sabiq vitse-prezidenti və İsveçrənin keçmiş xarici işlər naziri Mats Karlson, ABŞ Xarici Əlaqələr Milli Komissiyasının rəhbəri, ABŞ-ın BMT-dəki sabiq səfiri Rosemary Di Karlo, Bosniya və Herseqovina Parlamentinin spikeri Sefik Djaferovic, Serbiyanin xarici işlər naziri İvita Daçiç və Monteneqronun xarici siyasət idarəsinə rəhbərlik etmiş Srdjan Darmanoviçin çıxışı nəzərdə tutulub.

Qeyd edək ki, Bosniya və Herseqovina ilə Nizami Gəncəvi Beynəlxalq Mərkəzi arasında əməkdaşlıq əlaqələri mövcuddur. 2016-cı il noyabrında Sarayevoda Diasporla İş üzrə Dövlət Komitəsinin dəstəyi ilə Nizami Gəncəvi Beynəlxalq Mərkəzinin IX ali səviyyəli toplantısı, fevral ayında isə Bosniya və Herseqovinanın Rəyasət Heyətinin sədri Mladen İvaniçin dəstəyi ilə “Dinlərarası dialoq və ekstremizmə cavab” movzusunda xüsusi toplantı keçirilib.