23 İyun 2017 14:59
2 666
12 Punto 14 Punto 16 Punto 18 Punto

Səbail rayonunun Neftçilər prospekti ərazisində İraq vətəndaşı olan bir turistin gecə saat 3.30 radələrində 3 min manat pulu və mobil telefonu oğurlanıb.

Teleqraf.com xəbər verir ki, bununla bağlı Daxili İşlər Nazirliyi məlumat yayıb.

Oğurluqla bağlı məlumat dərhal aidiyyəti üzrə Səbail RPİ-nin 9-ci Polis Bölməsinə ötürülüb.

Əməliyyat qrupu yaradılıb və polislər hadisə yerinə gələrək araşdırmalara başlayıblar. Məlum olub ki, ölkəmizə turist kimi səfərə gəlmiş İraq vətəndaşı Manaf Abdulməcidi həmin gün tanış olduğu 3 qadını kirayədə qaldığı mənzilə dəvət edib.

Qısa tanışlıqdan sonra Manafın hamam otağında olduğu müddətdə həmin qadınlar evi tərk ediblər. Geri qayıdan Manaf Abdulməcid əl çantasında olan 3000 manat pulunun və “Samsung” markalı mobil telefonunun aparıldığını aşkar edib.

Polisin onların əlamətləri barədə sorğusuna cavab olaraq Manaf həmin qadınlardan birinin qolunda xüsusi görünüşü ilə fərqlənən döymə olduğunu bildirib.

Təhlükəsiz şəhər kameralarının görüntüləri əsasında həmin vaxt binadan çıxan qadınların taksiyə əyləşərək getdikləri müəyyən edilib. Taksinin sürücüsü qısa vaxtda tapılaraq polis bölməsinə dəvət edilib və həmin vaxt sərnişin qismində tanımadığı 3 qadını Fəvvarələr meydanı yaxınlığına apardığını bildirib.

Əməliyyat-axtarış tədbirləri nəticəsində qolunda göstərilən əlamətlərdə döymə olan qadınlardan biri – B.D Fəvvarələr meydanı yaxınlığında şübhəli şəxs qismində saxlanılaraq polis bölməsinə gətirilib. O, oğurluğu tanışları olan D.B və J.H ilə birlikdə törətdiklərini etiraf edib. Əməliyyatçılar həmin qadınların da yaşadıqları ünvanları müəyyən edərək onları şübhəli şəxs qismində polis bölməsinə gətiriblər.

Faktla bağlı araşdırma aparılır.

Əcnəbi turist cinayətin "isti izlər"lə açılmasına görə polis əməkdaşlarına minnətdarlığını bildirib.


Müəllif: Teleqraf.com