19 Oktyabr 2017 21:48
637
12 Punto 14 Punto 16 Punto 18 Punto

"Azərbaycana gələn turistlərin sayında 21% artım qeyd alınıb. Sözsüz ki, turizmin inkişafı müasir nəqliyyat vasitələri olmadan mümkün deyil".

Teleqraf.com-un məlumatına görə, bunu mədəniyyət və turizm naziri Əbülfəs Qarayev jurnalistlərə bildirib.

Onun sözlərinə görə, Azərbaycana avtobus və avtomobillə gələnlərin sayı çoxalıb: “Bundan başqa, yaxın vaxtlarda istismara veriləcək Bakı-Tbilisi-Qars dəmir yolunun turizm məqsədilə istifadəsi gündəlikdədir. Turizmin inkişafının birbaşa olaraq hava nəqliyyatı ilə bağlı olduğunu etiraf etməliyik. Hava nəqliyyatı isə son vaxtlar nəinki paytaxtda, eyni zamanda digər şəhərlərdə inkişaf edir”.
Nazir ölkə mədəniyyətinin tanıdılması istiqamətində də öz tövsiyələrini də verib: “Azərbaycan Hava Yolları” QSC (”AZAL”) təyyarələrdə sərnişinlərə müxtəlif nəşrlər təqdim edir. Mən hətta kiçik nəşrlərdə Azərbaycan şairlərinin şeirlərini, nağıllarımızı, uşaqlar üçün kitabların qoyulmasının tərəfdarıyam. Səfərə gələn insanlar Azərbaycan haqqında nəinki televiziya, nəşrlər vasitəsilə də məlumat almalıdırlar. Bu, mədəniyyətə yeni baxış ola bilər. Mədəniyyət Azərbaycanın aynası olaraq hər bir aviasiya şirkətinin sütunlarından biri olmalıdır. Əgər biz onu düzgün istifadə etmiriksə, məqsədimizə nail ola bilmərik. Azərbaycana gələnlər təkcə yemək, biznes, pul xərcləmək üçün gəlmirlər. Onlar ilk növbədə Azərbaycanın mədəniyyəti, həyat tərzi, təfəkkürü ilə tanış olmağa gəlirlər. Ona görə də hesab edirəm ki, turizm şirkətləri Azərbaycanın zəngin mədəniyyətinin təbliğini əsas götürməlidirlər”.

/Report/


Müəllif: Teleqraf.com