8 Dekabr 12:35
96

Ən qısa zamanda Vəkillər Kollegiyasına üzvlüklə bağlı elan veriləcək və sənəd qəbuluna başlanılacaq.

Teleqraf.com xəbər verir ki, bunu jurnalistlərə açıqlamasında Vəkillər Kollegiyasının Rəyasət Heyətinin yeni seçilmiş sədri Anar Bağırov deyib.

A.Bağırov indiyə qədər baş verənlərə görə məyus olduğunu bildirib: “Hesab edirik ki, Vəkillər Kollegiyası burada müəyyən çatışmazlığa, haradasa səhlənkarlığa yol verib. Biz çalışacağıq ki, bundan sonra bu cür hallar baş verməsin”.

Vəkillər Kollegiyasının Rəyasət Heyətinin yeni sədri Anar Bağırov vəkilliyə qəbulda keçid balının aşağı salınmasının tərəfdarı deyil.

“Vəkillər yüksək biliyə sahib olmalıdır ki, vətəndaşların hüquqlarını yaxşı müdafiə edə bilsinlər. Ancaq keçid balı məsələsi Vəkillər Kollegiyası tərəfindən tənzimlənmir, bizim qanunvericilik təşəbbüsü ilə çıxış etmək hüququmuz yoxdur. Ədliyyə Nazirliyinin İxtisas Komissiyası keçid balının aşağı salınması barədə qərara gəlsə, biz etiraz etməyəcəyik". - Anar Bağırov deyib.

A.Bağırov həmçinin, vəkilliyə qəbulla bağlı iş stajının aşağı salınmasının vacibliyini qeyd edib.

O bildirib ki, vəkilliyə qəbul üçün 3 il əmək stajı tələb olunduğuna görə, vəkilliyə əvvəllər istefaya gedən hüquqşünaslar, bu və digər səbəbdən vəzifədən çıxanlar üz tutur:

“Biz ali məktəbi bitirən savadlı gənc hüquqşünasların vəkilliyə üz tutmasını istəyirik. Ona görə də iş stajının aşağı salınması vacib məsələdir".

Azərbaycan Vəkillər Kollegiyasının yeni sədri Anar Bağırov rəhbərlik etdiyi qurumun gələcək planları barədə dədanışıb.

A.Bağırov jurnalistlərə bildirib ki, Vəkillər Kollegiyası ilk öncə vəkilliklə bağlı sənədlərin qəbuluna başlayacaq:

"Məlum olduğu kimi, qanunvericiliyə müvafiq dəyişikliklər edilib. Dəyişikliyə görə, yanvarın 1-dən fiziki şəxslərin məhkəmələrdə nümayəndə kimi çıxması məhdudlaşdırılır. Vətəndaşlara hüquqi yardımı yalnız peşəkar vəkillər həyata keçirəcəklər. Vəkillər Kollegiyası buna hazır olmalıdır. Məqsədimiz odur ki, ən qısa zaman ərzində sənəd qəbulu bərpa olunsun. Kollegiyanın üzvlərinin artırılmasına çalışacağıq".

A.Bağırov bildirib ki, Kollegiya həmçinin, regionlarda hüquqi yardım işini təkmilləşdirməyə çalışacaq:

"Məlum olduğu kimi, regionlarda vəkillərin sayı azdır və bu sahədə ciddi problemlər var. Biz bunun həlli yollarını tapmalıyıq. Ödənişsiz hüquqi yardımla bağlı da problemlər var. Bununla bağlı konsepsiya hazırlayacağıq. Məqsədimiz odur ki, ölkədə ödənişsiz hüquqi yardım institutu müasirləşdirilsin, standartlara cavab versin. Həmçinin, vəkillərin peşə hazırlığının artırılması məsələsi gündəmdədir. Biz istəyirik ki, hüquqi yardım göstərənlərin peşə hazırlığı yüksək olsun. Vəkillərin beynəlxalq fəaliyyətinə də üstünlük veriləcək. Eyni zamanda istəyirik ki, vəkillərin peşə bayramı qeyd edilsin. Bununla bağlı da müvafiq komissiya yaradılacaq və müvafiq qərarlar qəbul edəcəyik. Vəkillərin peşəkarlıq səviyyəsi artırılmalıdır".


Müəllif: Teleqraf.com