19 May 2016 11:23
189

Nazirlər Kabineti yanında İcbari Tibbi Sığorta üzrə Dövlət Agentliyi “İcbari tibbi sığortanın tətbiqi üzrə jurnalistlərin biliklərinin artırılması” mövzusunda təlim təşkil edib.

Teleqraf.com-un məlumatına görə, təlimin məqsədi səhiyyənin maliyyələşməsi və icbari tibbi sığorta haqqında media nümayəndələrini daha geniş informasiya ilə təmin etmək və agentliyin gələcək fəaliyyətində sıx əməkdaşlığa nail olmaqdır.

Tədbirdə bildirilib ki, səhiyyənin təşkili və icbari tibbi sığorta sahəsində ixtisaslaşdırılmış jurnalistlərin yetişdirilməsi gələcəkdə ölkəmizdə icbari tibbi sığortanın tətbiqi ilə bağlı ictimaiyyətin daha dolğun və düzgün məlumatlandırılmasına imkan verəcək.

Təlim zamanı jurnalistlər Azərbaycanın mövcud səhiyyə sistemi (tibbi xidmətin təşkili, strukturu və s.), səhiyyənin maliyyələşməsi mexanizmləri, digər ölkələrdə tətbiq edilən müxtəlif maliyyələşmə mexanizmləri, Azərbaycanda icbari tibbi sığortanın tətbiqi imkanları barədə məlumat verilib.

Təlimdə Agentliyin monitorinq, təhlil və informasiya texnologiyaları şöbəsinin müdiri İsa Əliyev, icbari tibbi sığorta şöbəsinin müdiri Vüqar Qurbanov, hüquq şöbəsinin müdiri Aysel İbayeva agentliyin fəaliyyət istiqamətləri, qanunvericiliklə agentliyə həvalə edilmiş hüquq və öhdəliklər, strukturu və fəaliyyətinin hüquqi əsasları barədə məlumat verib.

Naibə QURBANOBA


Müəllif: