12 Fevral 2018 11:39
2 176
12 Punto 14 Punto 16 Punto 18 Punto

Badamdar qəsəbəsindəki “Bulaq” restoranında baş vermiş silahlı insidentdə təqsirləndirilən Bəhruz Rəfiyev, Fuad Əsgərov, Tofiq Qaramizadə, Müzəffər Cəfərov, Araz Vəliyev, Murtuza Tağıyev, Süleyman Abdullayev və Hüseyn Hüseynovun cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Novruz Kərimovun sədrliyi ilə baş tutan prosesdə təqsirləndirilən şəxslər son söz deyiblər.

Kriminal aləmdə “Ayqa Samir” ləqəbi ilə tanınan Samir Allahyarov çıxış edib. O, sözü olmadığını, məhkəmədən ədalətli qərar gözlədiyini deyib.

Digər təqsirləndirilən Tofiq Qaramirzadə isə bildirib ki, Fuad Əsgərovla heç bir problemi yoxdur: “Fuadla mənim pul söhbətim olmayıb. Onun heç bir şikayəti yoxdur. Mənə öldürməyə cəhd ittihamı veriblər. Halbuki xuliqanlıq ittihamı ola bilər. Bir cavanlıqdır, eləmişik. Telefonda anlaşılmazlıq olub, biri-birimizə silah çəkmişik”.

Bəhruz Rəfiyev isə qeyd edib ki, özünü təqsirli bilmir: “Mən heç kimdən pul istəməmişəm. Heç kimə silah çəkməmişəm. Mən vurulmuşam. Xahiş edirəm, tələb edirəm ki, mənə bəraət verəsiniz”.

Süleyman Abdullayev və Fuad Əsgərov məhkəmədən ədalətli hökm gözlədiklərini deyiblər.

Növbəti proses fevralın 17-də davam edəcək.

Qeyd edək ki, prokuror Tofiq Qaramizadənin 12 il, Fuad Əsgərovun 15 il 6 ay, Bəhruz Rəfiyevin 13 il, Müzəffər Cəfərovun 7 il 9 ay, Samir Allahyarovun 18 il, Süleyman Abdullayevin 15 il, Araz Vəliyev, Murtuza Tağıyev və Hüseyn Hüseynovun isə 5 il müddətinə azadlıqdan məhrum edilməsini istəyib.

İttihama görə, cinayət hadisəsi 20015-ci il aprelin 21-də Səbail rayonunun Badamdar qəsəbəsində yerləşən “Bulaq” restoranında baş verib. Hadisə zamanı Fuad Əsgərov və Bəhruz Rəfiyev tapançadan açılan atəş nəticəsində yaralanıb, 30 yaşlı Süleyman Abdullayev isə bıçaqlanıb. Hər iki yaralı Bakıdakı özəl xəstəxanalardan birinə yerləşdirilib.

Polis və prokurorluq orqanları əməkdaşlarının əməliyyat-axtarış tədbirləri nəticəsində paytaxt sakinləri Tofiq Qaramizadə, Hüseyn Hüseynov, Bəhruz Rəfiyev və digər şəxslər tutulub.

Təqsirləndirilən şəxslər Cinayət Məcəlləsinin 29,120-ci (qəsdən adam öldürməyə cəhd), 221.2.1-ci (xuliqanlıq, bir qrup şəxs tərəfindən və ya təkrar törədildikdə), 182-ci (hədə-qorxu ilə tələb etmə) və 221.3-cü (xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddələri ilə ittiham edilib.

Hadisə kriminal aləmdə nüfuza malik olan Lotu Quli ləqəbi ilə tanınmış Nadir Səlifov və Rövşən Lənkəranski ləqəbi ilə tanınan Rövşən Canıyevin tərəfdarları arasında baş verən mübahisə ilə bağlı törədilib.


Müəllif: Hacı Zeynalov