14 Fevral 14:17

2015-ci il noyabrın 26-da baş vermiş Nardaran hadisələrində təqsirləndirilərək həbs olunan “Müsəlman Birliyi” Təşkilatının rəhbəri Taleh Bağırov, Azərbaycan Xalq Cəbhəsi Partiyasının sədr müavini Fuad Qəhrəmanlı və təşkilatın daha 9 üzvü məhkəmə qərarından kasasiya şikayəti verib.

Ali Məhkəmədən Teleqraf.com-a verilən məlumata görə, Taleh Bağırov, Fuad Qəhrəmanlı və “Müsəlman Birliyi” Təşkilatının 9 üzvünün kasasiya şikayəti hakim Şahin Yusifovun icraatına verilib.

Məhkəmənin ilkin baxış iclası fevralın 22-nə təyin edilib.

Məlumata görə, Taleh Bağırovun təşkilatının üzvləri – Abbas Hüseynov, Zakir Mustafayev, Abbas Quliyev, İbrahim Xudaverdiyev, Etibar İsmayılov, Əli Nuriyev, Əlibala Vəliyev, Fərhad Balayev, Ramin Yarıyev və Aqil Quliyev Bakı Apelyasiya Məhkəməsinin qərarından kasasiya şikayəti veriblər.

Bildirilib ki, təşkilatın digər üzvləri – Cabbar Cabbarov, Rasim Cəbrayılov, Şamil Abduləliyev, Cahid Babakişizadə, Bəhruz Quliyev və Abbas Tağıyev isə kasasiya şikayətləri məhkəməyə daxil olmayıb.

Bakı Ağır Cinayətlər Məhkəməsinin hökmü ilə Taleh Bağırov 20 il, Abbas Hüseynov 20 il, Fuad Qəhrəmanlı isə 10 il, Cabbar Cabbarov 19, Rasim Cəbrayılov 17, Şamil Abduləliyev, Zakir Mustafayev, Cahad Babakişizadə, Abbas Quliyev, İbrahim Xudaverdiyev, Etibar İsmayılov, Bəhruz Quliyev, Əli Nuriyev, Əlibala Vəliyev, Fərhad Balayev və Abbas Tağıyevin hər biri 14 il 6 ay, Ramin Yarıyev və Aqil Quliyevin hər biri 10 müddətinə azadlıqdan məhrum ediliblər.

Taleh Bağırov və Abbas Hüseynov cəzalarının 7 ilini qapalı rejimdə çəkəcəklər. Hökmdən narazı qalan təqsirləndirilən şəxslər apelyasiya şikayəti veriblər və barələrində bəraət hökmü çxıarılmasını istəyiblər.

Bakı Apelyasiya Məhkəməsinin qərarı ilə Taleh Bağırov, Fuad Qəhrəmanlı və onlarla birlikdə ittiham olunan digər şəxslərin apelyasiya şikayətləri təmin edilməyib.


Müəllif: Hacı Zeynalov