Opera və Balet Teatrı Almaniyaya dəvət alıb

Azərbaycan Dövlət Akademik Opera və Balet Teatrının simfonik orkestri Almaniyaya dəvət alıb.

Opera və Balet Teatrından Teleqraf.com-a verilən məlumata görə, buna səbəb simfonik orkestrimizin avqustun 1-dən 9-na kimi Bavariyada keçirilən XX yubiley Qut-İmmlinq Opera sənəti festivalında uğurlu çıxış etməsidir.

Məlumatda bildirilir ki, orkestr avqustun 7-də festivalın Qrand-final konsertində iştirak etmək şərəfinə layiq görülüb. Konsertdə məşhur vokalçılar – Mario Zhang, Vadim Kravets, Cefri Tarr, Cenifer Jakob, Reynhild Busmayer, Keyt Allen, Georgi Kirov, Deniz Yetim, Alin Stoika, Antonella Barnat, Əliəhməd İbrahimov, Simon Komasa və b. çıxış ediblər. Konsertin proqramına isə Avropanın bir çox məşhur bəstəkarları – C.Verdi, C.Puççini, C.Rossini, J.Bize, R.Leonkovallo, Ş.Quno, P.Maskanyi, P.Çaykovski, N.Rimski-Korsakov və b. populyar əsərləri daxil edilib. Qala-konsertdə orkestri festivalın bədii rəhbəri və baş dirijoru Korneliya fon Kerssenbrok, azərbaycanlı dirijorlar –Xalq artisti, professor Cavanşir Quliyev, Dirijorların beynəlxalq müsabiqələrinin laureatı, Prezident mükafatçısı Əyyub Quliyev və Murtuza Bülbül idarə edib.

Konsertdə klassik dünya bəstəkarlarının musiqiləri ilə yanaşı, Azərbaycan simfonik musiqisinin ən yaxşı nümunələri – Üzeyir Hacıbəylinin “Koroğlu” operasından Koroğlunun ariyası, Q.Qarayevin “Yeddi gözəl” və F.Əmirovun “Min bir gecə” baletlərindən parçalar, Niyazinin “Qaytağı”sı və Q.Qarayevin “Pavana” simfonik qravürləri, habelə P.Bülbüloğlunun “Eşq və Ölüm” baletindən parça və “Azərbaycan” əsəri səslənib.

Konsertdən sonra festivalın təşkilatçıları – Lüdviq Bauman və Korneliya fon Kerssenbrok azərbaycanlı musiqiçilərin ifasını yüksək dəyərləndirib, teatrın direktoru Akif Məlikova təşəkkürlərini bildirib. Onlar həmçinin Azərbaycanın Mədəniyyət və Turizm naziri Əbülfəs Qarayevə bu layihəyə dəstək verdiyinə və Azərbaycan mədəniyyətinin xaricdə təbliğinə böyük diqqətinə görə minnətdarlıqlarını ifadə ediblər.

Bununla yanaşı Azərbaycan orkestri yüksək professional çıxışına görə növbəti ildə Qut-İmmlinq festivalında iştirak etmək üçün dəvət alıb.

Nərmin