“Azdrama”da Lütfü Məmmədbəyov anıldı - FOTO

Bu gün Akademik Milli Dram Teatrında görkəmli teatr və kino xadimi, xalq artisti Lütfü Məmmədbəyovun 90 illik yubileyinə həsr olunan xatirə tədbiri keçirilib.

Teleqraf.com xəbər verif ki, tədbir Mədəniyyət və Turizm Nazirliyinin, Azərbaycan Teatr Xadimləri İttifaqının, Akademik Milli Dram Teatrının təşkilatçılığı ilə baş tutub.

Xatirə tədbirində çıxış edən Mədəniyyət və turizm nazirinin müavini Ədalət Vəliyev Lütfü Məmmədbəyovun Azərbaycan teatrı və kinosunun inkişafındakı xidmətlərindən danışıb: "Onun əməyi dövlət tərəfindən də yüksək qiymətləndirildi. Amma ən böyük qazancı istedadını üzə çıxardığı insanların yaddaşında yaşamasıdır. Bu gün onun tələbələri Azərbaycan səhnəsində çalışır".

Xalq artisti Hacı İsmayılov Lütfü Məmmədbəyovun yaradıcılıq yolundan danışıb. O bildirib ki, Məmmədbəyov səhnə fəaliyyətinə Musiqili Teatrda başlayıb. Amma sonra fəaliyyətini Gənc Tamaşaçılar, Akademik Dram Teatrda davam etdirib.

Tədbirdə çıxış edən Azər Paşa Nemət, Əminə Yusifqızı, Məleykə Əsədova, İlham Namiq Kamal onunla bağlı xatirələrini bölüşüblər.

Azərbaycan kinosunun və teatrının inkişafında böyük xidmətləri olan Lütfü Məmmədbəyov 6 fevral 1927-ci ildə Ağdaşda anadan olub. Teatr Texnikumunda (1943-1947), M.Əliyev adına ADİİ-nun rejissorluq fakültəsində (1961-1966) təhsil alıb.

1961-ci ildə Akademik Milli Dram Teatrına dəvət olunub və ömrünün sonunadək burada çalışıb. Böyük aktyorluq məktəbi keçmiş Lütfi Məmmədbəyov Akademik Milli Dram Teatrının səhnəsində bir neçə tamaşanın quruluşçu rejissoru, televiziyada 60-dan çox televiziya tamaşasının rejissoru olub.

Lütfü Məmmədbəyov 1 fevral 2004-cü ildə vəfat edib.

Nərmin