Nazirlik işə qarışdı: iki kinoteatr şəbəkəsinə xəbərdarlıq etdi

“Cinema Plus” və “Park Cinema” kinoteatrlar şəbəkələri arasında başlayan rəqabətin tamaşaçı və film istehsalçılarının ciddi narazılığına səbəb olması ilə bağlı Teleqraf.com-un qaldırdığı məsələyə Mədəniyyət və Turizm Nazirliyi münasibət bildirib.

Nazirliyin yaydığı məlumatda deyilir: “Ölkədə müstəqil şəkildə fəaliyyət göstərən “CinemaPlus” və “Park Cinema” kinoteatr şəbəkələri və onların nəzdindəki distribütor şirkətləri arasında son zamanlar yaranmış xoşagəlməz münasibətlər cəmiyyətdə və internet məkanında müzakirələrə səbəb olub.

Məntiqi izahı olmayan bu xoşagəlməz hal narahatlıq doğurmaya bilməz. Statusundan, fəaliyyət növündən asılı olmayaraq hər bir mədəniyyət müəssisəsinin vəzifəsi insanların asudə vaxtlarının səmərəli keçirilməsinə şərait yaratmaq və onlara yüksək səviyyəli mədəni xidmətin göstərməkdir. O cümlədən, kino sahəsində bir növ inhisarçı mövqe tutan müəssisələr tamaşaçı marağını hər şeydən üstün tutmalı və bu marağa zərər verə biləcək addımlara yol verilməməlidir.

Hazırda ölkəmizdə dövlət sifarişli filmlərlə yanaşı, müstəqil kino sahəsində də canlanma müşahidə edilməsi və milli filmlərə tamaşaçı marağının artması müsbət hal kimi xarakterizə oluna bilər. Bu prosesin inkişaf etməsi bütün maraqlı tərəflərin xoşməramlı münasibətindən asılıdır.

Ona görə də kino fəaliyyəti ilə məşğul olan hər bir müəssisə özəl biznes maraqları ilə yanaşı, həm də ümumi mənafelərin qorunmasına çalışmalıdır.

Mədəniyyət və Turizm Nazirliyi tərəfləri məsələnin qarşılıqlı hörmət və anlaşma şəraitində müsbət həllinə və gələcəkdə də ictimai narazılıq doğuran halların baş verməməsi üçün son dərəcə diqqətli olmağa çağırır.
Bildiririk ki, Azərbaycan filmlərinin yayımının təşkil olunması ölkəmizdə fəaliyyət göstərən hər bir kinoteatrın vəzifə borcudur”.

Qeyd edək ki, ölkədə fəaliyyət göstərən kinoteatrlar film istehsal edən şirkətlər qarşısında şərtlər qoymağa başlayıblar. Bu səbəbdən ekrana çıxan filmin prodüserləri öz məhsullarını bu balaca ölkədə tamaşaçıya çatdırmaqda çətinlik çəkirlər.

Kinoteatrların onların qarşısında qoyduqları şərtə görə, ekrana çıxacaq film bir kinoteatr şəbəkəsində göstərilirsə, digərində nümayiş oluna bilməz.

Teleqraf.com-un müxtəlif mövqeləri əks etdirmiş yazısı ilə bu linkdə tanış ola bilərsiz:

http://teleqraf.com/news/129404

Nərmin