Avroviziya təmsilçimizə iş tapşırıldı

Bu il ölkəmizi Avroviziya Musiqi Müsabiqəsində təmsil edən Diana Hacıyeva (DİHAJ) filmə musiqi bəstələyəcək.

Bu barədə Teleqraf.com-a Mədəniyyət və Turizm Nazirliyinin sifarişi ilə çəkilən “Xəyəlpərəstlər” filminin icraçı prodüseri Nadir Əliyev deyib.

“Xəyalpərəstlər” filminin həm mövzusu gənclərə ünvanlanıb, həm də yaradıcı heyətin əksəriyyəti gənclərdən ibarətdir. Ona görə qərara gəlinib ki, filmə Diana Hacıyeva musiqi bəstələyəcək. Diana çox istedadlı gənc xanımdır. O, bu il ölkəmizi Avroviziyada təmsil edəcək. Ona uğurlar arzu edirəm”.
Məlumat üçün bildirək ki, “Azərbaycanfilm” kinostudiyasında istehsal olunan filmin son montaj işləri gedir.

Filmdə baş rol ifaçıları Günəş Mehdizadə, Həsənağa Məmmədovdur. Digər rolları Emil Məcnunov, Tünzalə Qəhrəman, Teymur Məmmədov və başqaları canlandırıb.

Filmin rejissoru Rüfət Həsənov, ssenari müəllifləri Asif Rüstəmov, Rüfət Həsənov, operatoru Elman Əliyev, icraçı prodüseri Nadir Əliyev, prodüseri Müşfiq Hətəmovdur.

Nərmin