"Speys" televiziyasından möhtəşəm layihə: "Atların yürüşü..."

"Space" televiziyası Novruz bayramında "Yəhərlənib atlarımız" adlı möhtəşəm layihə ilə diqqət çəkib.

Teleqraf.com xəbər verir ki, "Space" televiziyasının böyük ajiotaja səbəb olan bu layihə "Mədəni irsimizi qoruyaq" şüarı ilə həyata keçirilib. Telekanalın ilk dəfə işğaldan azad edilən torpaqlarımızda təşkil etdiyi layihə həqiqətən alqışlara layiqdir.

Layihə çərçivəsində Qarabağ atlarının öz doğma vətəninə yürüşü baş tutub. Qarabağ atları insanların sevgisi ilə doğma torpağa yola salınıb.

Ağdamda Muğanlı Mərkəzində konsert proqramı ilə qarşılanan Qarabağ atları şəhərin xarabalıqlarından keçərək Şahbulaq qalasına yürüş edib.

Türk dünyasının yeni il bayramı olan Novruzda ilk dəfə Şahbulaq qalasında möhtəşəm konsert proqramında 30-a yaxın xalq artisti iştirak edib. "Space" televiziyasının "Yəhərlənib atlarımız" layihəsi aksiya xarakteri daşıyır. Hər il ermənilər Şahbulaq qalasında Tiqranakert qalası adı altında Yeni il bayramını keçirirdi.

Bu ilki "Yəhərlənib atlarımız" layihəsi böyük qələbənin təcəssümü sayıla bilər.

Bu aksiya ermənlərin yalnız insanlara deyil, mədəni irsimizə qarşı da böyük vəhşilik törətdiklərini göstərir. Biz indi mədəni irsimizi bərpa edir və onu özümüzə qaytarırıq.

"Yəhərlənib atlarımız" layihəsi martın 20-21-də "Space"in efirinə gedəcək.