“III Riçard” təqdim olundu - FOTO

Azərbaycan Dövlət Gənc Tamaşaçılar Teatrında 2015-ci ilin ilk premyerası olan “III Riçard” teatrsevərlərə təqdim olunub.

Teleqraf.com xəbər verir ki, uzun illər Azərbaycan teatrında səhnələşdirilməyən tamaşada baş qəhrəman III Riçardı əməkdar artist Şövqi Hüseynov canlandırıb.

Tamaşa vicdan hissindən məhrum olunmuş, taxta-taca sahib olmaq üçün doğmalarını bələ öldürtməkdən çəkinməyən, cinayətləri ilə ad çıxaran, səhnəyə gah Stalin, gah Beriya, gah da Hitler kimi çıxan qozbel və qolu iflic olan III Riçardın taxta-tac hərisliyindən bəhs edir.

Görkəmli ingilis dramaturqu U.Şekspirin 450 illiyinə həsr olunan tarixi tamaşanın quruluşçu rejissoru xalq artisti Cənnət Səlimova, baletmeysteri Rusiya Federasiyasının Əməkdar İncəsənət Xadimi Sergey Qrisay, quruluşçu rəssamı Elşən Sərxanoğludur.

Səhnə əsərində əsas obrazları xalq artisti Ağaxan Salmanlı, əməkdar artistlər Nofəl Vəliyev, Gülər Nəbiyeva, Qəmər Məmmədova, Leyli Vəliyeva, Nəsibə Eldarova, Rahib Əliyev, Vahid Əliyev, aktyorlar Mehriban Abdullayeva, İradə Rəşidova, Natiq Fərzəliyev, Təhminə Məmmədova, Kərəm Hadızadə, Elşən Çarhanlı, Elnur Kərimov və başqaları ifa ediblər.

Tamaşadan sonra teatrın direktoru, əməkdar artist Mübariz Həmidov səhnəyə çıxaraq bütün kollektivi yeni premyera münasibətilə, tamaşanın quruluşçu rejissoru, xalq artisti, Prezident təqaüdçüsü Cənnət Səlimovanı isə anadan olmasının 75 illik yubileyi münasibətilə təbrik edərək ASSİTEJ-Azərbaycan Milli Mərkəzinin və Azərbaycan Dövlət Gənc Tamaşaçılar Teatrı adından diplomla təltif edib.

Nərmin