Teatr mövsümünə ən tez Musiqili Teatr start verəcək

Ötən mövsüm bir sıra ilklərə imza atmış Azərbaycan Dövlət Musiqili Teatrı yeni – 106-cı mövsümə də bir sıra yenilik və sürprizlərlə hazırlaşır.

Teatrın mətbuat xidmətinin rəhbəri Samir Sədaqətoğlu Teleqraf.com-a açıqlamasında bildirib ki, Musiqili Teatr ölkədə yeni mövsümə ən tez – sentyabrın 10 –da start verəcək. Mövsümün açılışı dahi Üzeyir Hacıbəylinin “O olmasın, bu olsun” tamaşasıyla baş tutacaq. 8-9 sentyabr tarixlərində Bakıda Azərbaycan Respublikası Dövlət Gömrük Komitəsinin təşkilatçılığı ilə Ümumdünya Gömrük Təşkilatının MDB üzrə Regional Məlumat Əlaqələndirmə “Rilo-Moskva” iştirakçı ölkələrin gömrük xidmətləri milli əlaqələndirmə qovşağı rəhbərlərinin 14-cü iclası keçiriləcək. İclas çərçivəsində nəzərdə tutulan bədii proqramın 10 sentyabr tarixində Azərbaycan Dövlət Musiqili Teatrında təşkil edilməsi nəzərdə tutulub: “Məhz buna görə də mövsümün açılış günü “O olmasın, bu olsun” tamaşası ingilis dilində tərcümə sətirlər – qaçan titrlər vasitəsilə nümayiş olunacaq. Bu ölməz səhnə əsərini 2-5 may tarixlərində Bakı şəhərində Asiya İnkişaf Bankının (AİB) Rəhbərlər Şurasının 48-ci İllik Toplantısı keçirilən zaman toplantı tədbirləri çərçivəsində dünyanın müxtəlif ölkələrinin Maliyyə nazirləri və digər yüksək vəzifəli şəxsləri, Azərbaycanın adı ilə tarixə düşümüş I Avropa Oyunları münasibətilə ölkəmizə gəlmiş qonaqlar məmnunluqla izləyərək yüksək qiymətləndiriblər. Tamaşanı izləmiş mötəbər qonaqlar dəfələrlə teatrın direktoru, əməkdar incəsənət xadimi, sənətşünaslıq üzrə fəlsəfə doktoru Əliqismət Lalayevə dahi Üzeyir Hacıbəylinin ecazkar və möhtəşəm musiqisindən, ümumilikdə tamaşadan böyük zövq aldıqlarını və razı qaldıqlarını bildiriblər”.

Qeyd edək ki, “O olmasın, bu olsun” tamaşasının quruluşçu-rejissoru Azərbaycan Respublikasının xalq artisti, “Şöhrət” ordenli, Cənnət Səlimovadır. Tamaşada rolları milyonların sevimli gülüş ustası, xalq artisti, “Şöhrət” ordenli Afaq Bəşirqızı, əməkdar artistlər Şövqi Hüseynov, Əkbər Əlizadə, Ələkbər Əliyev, Səidə Şərifəliyeva, Novruz Əliyev, aktyorlar Səmədzadə Xasıyev, Əzizağa Əzizov, Nadir Xasıyev, Hüseyn Əlili və başqaları ifa edirlər.

Nərmin