22 Yanvar 2016 16:10
535

Azərbaycan Respublikası Prezidentinin Sərəncamına əsasən Maqsud İbrahimbəyova “Şərəf” ordeni təqdim edilib. Mədəniyyət və Turizm Nazirliyindən Teleqraf.com-a verilən məlumata görə, yanvar ayının 22-də mədəniyyət və turizm naziri Əbülfəs Qarayev Azərbaycan Respublikası Prezidentinin Sərəncamına əsasən təltif edilən xalq yazıçısı, kinodramaturq, rejissor Maqsud İbrahimbəyova “Şərəf” ordenini təqdim edib. Tədbir mərasimi Maqsud İbrahimbəyovun yaşadığı evdə keçirilib.

Azərbaycan teatr və kino sənətinin inkişafında böyük xidmətlərinə görə 7 may 2015-ci il tarixində Maqsud Məmmədibrahim oğlu İbrahimbəyov “Şərəf” ordeni ilə təltif edilib. Nazir Əbülfəs Qarayev Maqsud İbrahmbəyovun Azərbaycan teatr və kino sənətinin inkişafına böyük töhvələr verdiyini qeyd edib. O, M.İbrahimbəyovun əsərləri əsasında çoxsaylı tamaşaların səhnəyə qoyulduğunu bildirib. Həmçinin, yazıçının əsərlərinin xarici dillərə tərcümə olunduğu diqqətə çatdırılıb.

Maqsud İbrahimbəyov yaradıcılığına verilən yüksək qiymətə və diqqətə görə Prezident İlham Əliyevə dərin minnətdarlığını bildirib.

Xalq yazıçısı Maqsud İbrahimbəyov 1935 - ci il may ayının 11- də Bakıda anadan olub. O, 1976-cı ildə Azərbaycan Dövlət Mükafatı laueatı, 1979-cu ildə Azərbaycan SSR Əməkdar İncəsənət xadimi, 1988-ci ildə Azərbaycan xalq yazıçısı, 1995-ci ildə “Şöhrət” və 2005-ci ildə “İstiqlal” ordenləri ilə təltif olunub.

Dünyanın və Azərbaycanın müxtəlif jurnallarında romanları, povestləri və hekayələri dərc olunub. O cümlədən: “Azərbaycan”, “Drujba narodov”, “Novıy mir”, “Yunost”, “Roman – qazeta”, “Literaturnı Azerbaydjan” və başqalarında. Bu əsərlər sırasında: “Bütün yaxşılıqlara görə ölüm”, “Truskavetsə kim gedəcək”, “Ondan yaxşı qardaş yox idi”, “Qoy o bizimlə qalsın”, “Bayquş gəldi”, “Kərgədan buynuzu”, “Axırı yaxşı qurtaran əhvalat” və başqalarını qeyd etmək olar. M.İbrahimbəyovun nəsr əsərləri 26 xarici dilə tərcümə olunub.

M.İbrahimbəyovun ssenariləri əsasında müxtəlif ölkələrdə 18 bədii və 7 sənədli film çəkilib. Onlardan “Bizim Cəbiş müəllim”, “Uşaqlığın son gecəsi”, “Yarımçıq qalmış serenada”, “Truskavetsə kim gedəcək?”, “Gözəl bir gündə” (“V odin prekrasnıy den”), “Sonunucu intervü”, “Bayquş gəldi”, “Qızıl reys”, “Axırı yaxşı qurtaran əhvalat”, “Bakı müharibə illərində” filmləri ölkə kinematoqrafiyasının qızıl fonduna daxil olub.

Nərmin


Müəllif: