Əliabbas Qədirovun 70 illik yubileyi keçirildi - FOTOLAR

Akademik Milli Dram Teatrında xalq artisti Əliabbas Qədirovun 70 illik yubileyi münasibəti ilə xatirə tədbiri keçirilib.

Teleqraf.com xəbər verir ki, tədbirdə mədəniyyət və turizm nazirinin müavini Ədalət Vəliyev, Akademik Milli Dram Teatrının bədii rəhbəri və direktoru, xalq artisti Azər Paşa Nemət, teatr xadimləri, aktyorun ailə üzvləri iştirak edib.

Azər Paşa Nemət Əliabbas Qədirovun Azərbaycan teatrının, eləcə də Akademik Milli Dram Teatrının inkişafında gördüyü işlərdən danışıb, səbəbkarla bağlı xoş xatirələrini bölüşüb. Səbəbkarın oğlu İlham Qədirov belə bir gecənin təşkilinə görə mədəniyyət və turizm naziri Əbülfəs Qarayevə, nazirliyin əməkdaşlarına, Akademik Milli Dram Teatrının kollektivinə və tamaşaçılara təşəkkür edib: “Bu gün atama ən böyük qiyməti sizlər verdiniz. Bu gün burada toplaşmağınız sizlərin atama, onun sənətinə olan sevginin göstəricisidir. Bu gün ikili hisslər yaşadım. Hamınıza təşəkkür edirəm”.

Daha sonra tədbiri aparıcılar - Xalq artistləri Laləzar Mustafayeva, Məleykə Əsədova, Əməkdar artistlər Sabir Məmmədov, Elşən Cəbrayılov davam etdirib. Sənətkarlar Əliabbas Qədirovun həyat və yaradıcılığına nəzər salıb, yer aldığı tamaşalar və filmlər haqda danışıblar.

Qeyd edilib ki, 13 fevral 1946-cı ildə Bakıda anadan olan Əliabbas Qədirov 1965-ci ildə Mirzağa Əliyev adına Azərbaycan Dövlət Teatr İnstitutunun dram və kino aktyorluğu fakültəsinə daxil olub. Tələbəlik illərində institutun tədris teatrının ştatlı aktyoru kimi burada Cəfər Cabbarlının “Aydın” (Surxay), Hüseyn Cavidin “Azər”, Afanasi Salinskinin “Təbilçi qız” (Fyodr) əsərləri əsasında hazırlanan tamaşalarda maraqlı rollar oynayıb. O, 1970-ci il aprelin 6-dan Milli Dram Teatrının aktyoru olub. 26 dekabr 2001-ci ildə teatrın bədii rəhbəri və direktoru təyin edilən sənətkar 2006-cı ildə Bakıda dünyasını dəyişib.

Gecədə Əliabbas Qədirovun iştirak etdiyi teatr, televiziya tamaşaları, filmlərdən kadrlar nümayiş olunub, səsləndirdiyi şerlərdən parçalar təqdim edilib.

Həmçinin mərasimdə müğənnilər İlqar Muradov, Aygün Bəylər, Mətanət İsgəndərlinin ifasında musiqi nömrələri yer alıb.

Nərmin