Röya mükafatlandırıldı

Ötən gün Mədəniyyət və Turizm naziri Əbülfəs Qarayev Prezident İlham Əliyev tərəfindən fəxri adlara layiq görülən sənət adamlarına mükafatları təqdim edib.

Muzey Mərkəzində baş tutan tədbirdə nazir Prezident İlham Əliyevin mədəniyyətimizə, sənət adamlarına diqqət və qayğısından danışıb: “Cənab Prezidentin mədəniyyət və incəsənət sahəsində imzaladığı sərəncamlar bu sahənin inkişafını şərtləndirən amillərdəndir. Son illər Heydər Əliyev Fondunun mədəniyyət sahəsindəki gördüyü işlər hər kəsin gözü qarşısındadır. Dünyanın müxtəlif ölkələrində mədəniyyətimizin təbliği istiqamətində görülən işlər, keçirilən tədbirlər çox şeylərdən xəbər verir. Bu gün mükafat alanların sırasında Azərbaycanın müxtəlif bölgələrində fəaliyyət göstərən teatr xadimləri, dünyada ölkəmizi təmsil edən rəssamlarımız var”.

Daha sonra fəxri ad alan mədəniyyət xadimlərinə mükafatlar təqdim olunub. Fəxri ad alanların sırasında rejissor Eldar Quliyev, yazıçı Əli Əmirli, teatrşünas Aydın Talıbzadə, şair-jurnalist Qulu Ağsəs və müğənni Röya Ayxan da var.