Nəsibə Zeynalovanın yubiley tədbirləri açıqlandı

Azərbaycan teatr və kino sənətinin görkəmli nümayəndəsi, böyük gülüş ustası, xalq artisti Nəsibə xanım Zeynalovanın anadan olmasının 100 illiyi ilə əlaqədar keçiriləcək tədbirlərin siyahısı açıqlanıb.

Dövlət Musiqili Teatrının direktoru Əliqismət Lalayevin Teleqraf.com-a bildirdiyinə görə, ilk tədbir sənətkarın doğum günü - 20 apreldə baş tutacaq. Mədəniyyət və Turizm Nazirliyi rəsmilərinin, Musiqili Teatr kollektivinin və Nəsibə xanım Zeynalovanın yaxınlarının iştirakı ilə gülüş ustasının Fəxri xiyabandakı məzarı ziyarət ediləcək.

Bu ilin noyabr ayında isə Azərbaycan Dövlət Musiqili Teatrında korifey sənətkarın yubiley gecəsi keçiriləcək.

Yubiley tədbirlərinin yüksək səviyyədə qeyd olunması ilə əlaqədar Azərbaycan Prezidenti İlham Əliyev 17 mart 2016-cı il tarixli Sərəncam imzalayıb.

Nəsibə Cahangir qızı Zeynalova 20 aprel 1916-cı ildə Bakı şəhərində anadan olub. Əslən Bakılı olan atası Kərbəlayi Cahangir dövrünün tanınmış tacirlərindən biri və aktyor olub. İki yaşında ikən atasını itirən Nəsibə Zeynalova onun yolunu davam elətdirərək aktyor peşəsini seçib və Azərbaycan teatr və kino sənətinin layiqli nümayəndələrindən biri kimi şöhrət qazanıb. Aktirsanın müxtəlif səhnə əsərlərində və filmlərdə yaratdığı bənzərsiz obrazlar onun adını Azərbaycan mədəniyyət tarixinə qızıl hərflərlə həkk edib.

Nəsibə Zeynalova 10 mart 2004-cü il tarixində Bakı şəhərində vəfat edib.

Nərmin