Kamilə Babayeva: “Bu, hər birimiz üçün böyük qürurdur”

“Bakı-2015" Birinci Avropa Oyunlarının ölkəmizdə keçirilməsinə sevinən məşhurlar arasında aparıcı Kamilə Babayeva da var.

O, hesab edir ki, Avropa Oyunları hamı tərəfindən bayram ab-havasında qarşılanmalıdır: ”Azərbaycanın vətəndaşı kimi demək istəyirəm ki, “Bakı-2015" Avropa Oyunlarının ölkəmizdə keçirilməsi ilə bağlı içim qürur, fərəh, həyəcan, sevgi hissləri ilə doludur. Böyük məmnuniyyətlə, böyük səbirsizliklə Avropa Oyunlarının başlanmasını gözləyirəm. Doğrudur, alov hazırda eldən-elə, obadan-obaya gəzir. Biz artıq alovun istisini hiss edirik ki, Avropa Oyunları tam qapımızın ağzındadır. Xoş gəlir, səfa gətirir, Avropa Oyunları. Bu, bizim hər birimiz üçün böyük qürurdur.

Avropa Oyunlarını böyük bir bayram hesab edirəm. Oyunlar sayəsində Avropa bizi daha yaxından tanıyacaq. Çünki Avropa Oyunları zamanı ölkəmizə çoxlu sayda idmançılar, qonaqlar, bu oyunları izləmək üçün turistlər gələcək. Onlar Azərbaycanı görüb, mədəniyyəti, qonaqpərvərliyi ilə tanış olacaqlar. Məncə, bu, çox böyük fürsətdir. Və əminəm ki, “Bakı-2015" Avropa Oyunları çox gözəl keçəcək və biz bununla tarix yazacağıq”.

Aparıcı qeyd edib ki, tamaşaçı kimi Avropa Oyunlarında yaxından iştirak edəcək: “Mən, əslində, su idman növlərini çox sevirəm. Amma bu oyunlarda müxtəlif idman növləri cəm olub. Məncə, Avropa Oyunlarında təmsil olunan bütün idman növləri üzrə yarışları izləmək lazımdır”.

Nərmin