Romada tələbələrin “Bakı-2015” coşqusu

Azərbaycan Tələbə Şəbəkəsinin təşkilatçılığı ilə Romada “Bakı-2015” ilk Avropa Oyunlarının açılış mərasimini izləmək üçün ölkəmizi və müxtəlif dövlətləri təmsil edən 70-dən çox tələbə bir araya gəlib.

Tələbələr Romanın məşhur məkanlarından birində quraşdırılmış monitordan “Bakı-2015”-in 3 saat davam edən möhtəşəm açılış mərasimini birgə izləmək imkanı əldə ediblər. Azərbaycanın zəngin mədəniyyətini, qədim tarixini və müasir həyatını əks etdirən elementlərin nümayiş olunduğu mərasimi tələbələr böyük coşqu və heyranlıqla izləyiblər.

Avropa ölkələrinin bayraqları Bakı Olimpiya Stadionunda dalğalandıqca Romada təhsil alan müxtəlif ölkələrin tələbələri Azərbaycanın sülh, həmrəylik və birlik dəyərlərinin təbliğatçısına çevrildiyinin bir daha şahidi olublar.