Avropa Oyunlarında boksçularımızın rəqibləri məlum oldu

Avropa Oyunlarında iştirak edəcək boksçularımızın rəqiblərinin adına aydınlıq gəlib.

Azərbaycan Boks Federasiyasından Trend-ə verilən məlumata görə, yarışın ilk iki günündə - iyunun 16-sı və 17-də Azərbaycan idmançılarından heç kim rinqə çıxmayacaq. İyunun 18-də iki boksçumuz mübarizəyə başlayacaq. 64 kq çəki dərəcəsində çıxış edən Lorenzo Sotomayor 1/16 final mərhələsində sloveniyalı Edin Sejdinoviçi məğlub etməyə çalışacaq.

Bu dəfə 81 kq çəki dərəcəsində çıxış edəcək Avropa çempionu, Olimpiya Oyunlarının bürünc mükafatçısı Teymur Məmmədov isə 1/16 finalda Böyük Britaniya təmsilçisi Coşua Buatsi ilə qarşılaşacaq.

49 kq çəki dərəcəsində mübarizə aparan Salman Əlizadə yarışa ¼ final mərhələsindən başlayacaq. Onun ilk rəqibi Brendan İrvin (İrlandiya) – Tinko Banabakov (Bolqarıstan) cütünün qalibi olacaq. S.Əlizadə apreldə Bakıda keçirilən “Böyük İpək Yolu” turnirində məhz T.Banabakova uduzmuşdu.

Avropa çempionatının mükafatçısı Elvin Məmişzadə (52 kq) 1/8 finalda ya irlandiyalı Mayles Kasey, ya da belaruslu İvan Fiqurenka ilə görüşəcək.

Tayfur Əliyev də (56 kq) yarışa 1/8 final mərhələsindən qoşulacaq. Gənc boksçumuz Nikolae Andreiana (Rumıniya) – Dieqo Ferrer Pereyra (İspaniya) cütünün qalibi ilə üz-üzə gələcək.

Rio-de-Janeyro olimpiadasına vəsiqə qazanan Albert Səlimov (60 kq) 1/8 finalda Artyom Ramlavs (Latviya) – Otar Eranosyan (Gürcüstan) qarşılaşmasının qalibi ilə döyüşəcək.

Pərviz Bağırov (69 kq) yarışa 1/8 final mərhələsindən qatılacaq. Milli komandamızın üzvü Anas Messaoudi (Belçika) – Vasili Belous (Moldova) görüşünün qalibi ilə qarşılaşacaq.

Xaybulla Musalov (75 kq) 1/8 finalda Kristia Mbilli Assomo-Hallier (Fransa) – Viktor Karapçevşii (Moldova) döyüşünün qalibi ilə üz-üzə gələcək.

Milli komandamızın yeni üzvlərindən Abdulqadir Abdullayev (91 kq) 1/8 finalda Adam Hamori (Macarıstan) – Erik Tlkanek (Slovakiya) görüşündə qalib gələn boksçunu sınağa çəkəcək.

Əsas medal ümidlərimizdən ikiqat dünya çempionu, Olimpiya Oyunlarının bürünc mükafatçısı Məhməmədrəsul Məcidov 1/8 finalda mübarizəyə qoşulacaq. Komandamızın kapitanı Vladislav Sirenko (Ukrayna) – Mixail Baxtidze (Gürcüstan) görüşünün qalibi ilə qarşılaşacaq.

Qadın boksçularımızın rəqibləri:

51 kq. 1/8 final Anaxanım Ağayeva – Sandra Drabik (Polşa) - 19 iyun

54 kq. ¼ final Anna Əlimərdanova – Stanimira Petrova (Bolqarıstan) - 23 iyun

60 kq. 1/8 final. Yana Alekseyeva – Mira Potkonen (Finlandiya) - 21 iyun

64 kq. ¼ final. Yelena Vıstropova – Sandi Ryan (Böyük Britaniya) – Sindi Rogge (Almaniya) cütünün qalibi

75 kq. 1/8 final. Leyla Cavadova – Yaroslava Yakuşina (Rusiya) - 19 iyun