Taekvondo: Prezident İlham Əliyev Radik İsayevin qızıl medalını təqdim etdi- YENİLƏNİB

Azərbaycanı +80 kiloqram çəkidə təmsil edən Radik İsayev rusiyalı Vladislav Larinlə final görüşünə çıxıb. Birinci hissədən sonra hesab açılmayıb. İkinci hissədə hesab 2-1 təmsilçimizin xeyrinə dəyişib. Takvondoçumuz 4-3 hesabı ilə qələbə çalaraq birinci Avropa Oyunlarının qızıl medalını qazanıb.

R.İsayevin döyüşünü yarışın keçirildiyi Bakı Kristal Zalda Azərbaycan Prezidenti İlham Əliyev və xanımı Mehriban Əliyeva da izləyib.

Qaliblərin mükafatlandırılma mərasimində Radik İsayevin medalını Azərbaycan Prezidenti təqdim edib. Taekvondo Federasiyasının prezidenti Kəmaləddin Heydərov isə qızıl medalçımıza hədiyyə verib.

17:19

80 kq çəki dərəcəsində kişilər arasınnda taekvondo yarışında Azərbaycan təmsilçisi Radik İsayevin yarımfinal döyüşü başlayıb. Sloveniyalı İvan Traykoviçlə qarşılaşan taekvondoçumuz birinci hissəni 3-0 irəlidə başa vurub. İkinci hissədə hesabına 17 xal yazdıran İsayev günün ilk finalçısı adını qazanıb. Rəqib isə cəmi 2 xal toplaya bilib.

15:15

Kişilər arasındakı yarışda dünya çempionumuz Radik İsayev (-80 kq) 1/4 finalda Hollandiya təmsilçisi Jeron Vanruijla (Hollandiya) tatamidə üz-üzə gəlib. Görüş saat 15:15-də başlayıb. İlk hissədə təmsilçimiz 3 xal qazanıb. Görüş 8-6 taekvondoçumuzun xeyrinə başa çatıb.

Taekvondo Federasiyasının prezidenti Kəmaləddin Heydərov R.İsayevin döyüşünü izləmək üçün yarışın keçirildiyi Bakı Kristal Zala gəlib.

10:15

Bu gün Bakı Kristal Zalda “Bakı-2015” Avropa Oyunlarında taekvondo yarışlarının son günü keçirilir.

Teleqraf.com-un məlumatına görə, yarışların dördüncü günündə tatamiyə ağır çəkili - kişilər -80, qadınlar -67 kq çəki dərəcəsində taekvondoçular çıxacaq.

Azərbaycan yığması hər 2 çəki dərəcəsində təmsil olunur.

Qadınlar arasında 21 yaşlı Mariya Tedeyeva ilk döyüşündə təcrübəli rəqiblə qarşılaşır. Saat 10:15-də yarışa start verilib. Taekvondoçumuz ilkin mərhələdə 27 yaşlı ukraynalı Marina Koniyeva ilə üz-üzə gəlib.
Birinci hissədə rəqibini 1-0 üstələyən təmsilçimiz növbəti raundda da 1 xal qazanıb. Lakin rəqibi ikinci turda hesabını M.Tedeyeva ilə eyniləşdirib. Üçüncü turda isə 10 xal qazanan ukraynalı təmsilçi taekvondoçumuza qalib gəlib: 10-4. Əgər Koniyeva finala yüksələrsə, Tedeyeva bürünc medal uğrunda çıxışını davam etdirəcək.

Kişilər arasındakı yarışda isə Radik İsayev (-80 kq) ilkin mərhələdən azaddır. Dünya çempionumuz 1/4 finalda Ali Sarını (Türkiyə) məğlub edən Jeron Vanruijla (Hollandiya) qarşılaşacaq. Görüş saat 15:15-də başlayacaq.

Qeyd edək ki, taekvondo yarışlarının ilk 3 günündə yığmamızın heyətində Ayxan Tağızadə (-68 kq) və Milad Beiqi Harçeqani (-80 kq) qızıl, Fəridə Əzizova (-67 kq) gümüş, Patimat Abakarova (-49 kq) bürünc medal qazanıb.