ABŞ-da aeroportda silahlı insident: 5 ölü, 13 yaralı

ABŞ-ın Fort-Loderdeyl şəhərində baş verən silahlı insident nəticəsində 5 nəfər ölüb, 13 nəfər xəsarət alıb.

Bunu Fort-Loderdeyl şəhərinin meri Barbara Şerif bəyan edib.

“Hadisə nəticəsində 5 nəfər ölüb, 13 nəfər yaralanıb. Xəsarət alanlar xəstəxanalara yerləşdirilib. Cinayəti törədən şəxs saxlanılıb”, deyə B.Şerif bildirib.

Qeyd edək ki, ABŞ-ın Fort-Loderdeyl şəhərində (Florida ştatı) naməlum şəxs hava limanında atəş açıb. İlkin məlumata əsasən, 5 nəfəri öldürən şəxs təxminən 35 yaşlı Latın Amerika əsilli şəxsdir.

***

23:30

Polis Florida ştatında silahlı insident nəticəsində 5 nəfərin öldüyünü təsdiqləyib.

Bu barədə CNBC telekanalı məlumat verib.

Fort-Loderdeyl şəhərinin hava limanında baş verən insident zamanı 8 nəfərin yaralandığı bildirilir.

Atəşi açan şəxsin saxlanıldığı, hava limanında vəziyyətin nəzarət altında olduğu bildirilir.

***

22:28

ABŞ-ın Fort-Loderdeyl şəhərində (Florida ştatı) silahlı insident baş verib.

Naməlum şəxsin hava limanında açdığı atəş nəticəsində azı 5 nəfər ölüb.

NBC telekanalının məlumatına görə, insident zamanı 9 nəfər yaralanıb. Cinayəti törətməkdə şübhəli bilinən şəxs saxlanılıb. Onun adı və motivləri hələ ki, açıqlanmır.
\APA\