Ərdoğandan çağırış: Qüdsə gedin!

Türkiyə Prezidenti Rəcəb Tayyib Ərdoğan Ədalət və İnkişaf Partiyasının qrup toplantısında iştirak edib.

Teleqraf.com xarici mediaya istinadla xəbər verir ki, Ərdoğan toplantıda çıxışı zamanı maraqlı açıqlamalarla yadda qalıb.

Türkiyə prezidenti ilk olaraq, ABŞ-ın Türkiyənin S-400 raketlərinə sahib olması ilə bağlı reaksiyasına münasibət bildirib:

"Uzun illərdir NATO ölkəsi olan Yunanıstan S-300 raketlərindən istifadə edir. Nədən narahat olurlar? Biz Rusiya ilə bu məsələdə razılaşma əldə etmişik. S-400 raketləri Türkiyəyə gətiriləcək və Rusiya ilə birgə bu raketlərin istehsalına başlayacağıq".

Türkiyə prezidenti son günlər Əl-Əqsa məscidi ətrafında və Şərqi Qüdsdə baş verənlərə sərt reaksiya verib:

"Hazırda Qüdsdə terrorçuluqla mübarizə adı altında Əl-Əqsa məscidini müsəlmanların əlindən almağa çalışırlar. Dəmir detektorların ləğv edilməsi qərarını alqışlayırıq. Güman edirik ki, ardı gələr. Buradan bütün müsəlmanlara səslənirəm. İmkanı olan hər kəs Qüdsü, Əl-Əqsa məscidini ziyarət etsin. Ora gedə bilməyənlər Qüdsdəki qardaşlarımıza yardım göstərsin. Məkkə və Mədinə kimi ora da sahib çıxaq".