Avropadan Trampa sərt sözlər - “Artıq Ağ evə inanmırıq”

Almaniya xarici işlər naziri Heiko Maas Ağ evə artıq inanmayacaqlarını bildirib.

Teleqraf.com xəbər verir ki, nazir yerli mətbuata açıqlamasında ABŞ prezidenti Donald Trampın Avropa Birliyinə (AB) “düşmən” kəsildiyini və AB-nin buna qarşı birgə dirəniş göstərməsinin vacibliyini qeyd edib.

"Ağ evə artıq qeyd-şərtsiz güvənməyin. Əməkdaşlıq üçün şərtlər yenidən gözdən keçirilməlidir. Bunun üçün özgüvənli və müstəqil AB-nin olması vacibdir. Trampın tvitterləri absurddur. Onun tvitləri Avropanı bölməməli, AB ölkələrini bir-birinə daha yaxın etməlidir".

Avstryanın iqtisadiyyat naziri Marqarete Schramböck Trampın AB-ni düşmən kimi görməsinə sərt təpki verərək qeyd edib ki, Avropa ABŞ-ın düşməni yox, dostudur: "Biz ABŞ-dan dostluğun qarşılığını görmək istəyirik. Fəaliyyətimizə qiyməti tvitterdən öyrənmək istəmirik".