Moskva Köçəryanı meydana qaytarır - Paşinyana qarşı qiyam hazırlığı

Ermənistanın keçmiş prezidenti Robert Köçəryanın həbsi siyasi məqsəd daşıyırdı.

Teleqraf.com Ermənistan KİV-ə istinadla xəbər verir ki, bunu erməni politoloq Xrant Mikaelyan deyib.

Politoloq bunu Köçəryanın hakimiyyət iddiası ilə izah edir:

“Köçəryanın həbsi qiyamla hakimiyyətə gəlmiş Baş nazir Nikol Paşinyana lazım idi. Bu baxımdan hesab etmək olar ki, keçmiş prezident 2008-ci il martın 1-də baş vermiş qırğınlarda formal günahkar elan edilib. Yəni, ona qarşı qiyam hazırlamasından xəbər tutan Paşinyan Köçəryanın planını yaxından təqib etmək üçün onu həbs etdirdi. Başqa sözlə, bu həbsin motivləri daha ciddidir.

Paşinyanın qənaətinə görə, vəziyyət onun üçün daha mürəkkəbdir. 10 il əvvəl güc tarazlığı tamamilə fərqli idi, lakin indi Paşinyan cəmiyyətin böyük əksəriyyəti tərəfindən dəstəklənir. Bu, 80 faiz dəstək deməkdir. Həmin 80 faiz Kəçəryanın həbsdə saxlanılmasını istəyir.

Görünən budur ki, Köçəryanın başçılıq etdiyi klan siyasi meydanın tamamilə küncünə sıxışdırılıb”.

Mikaelyan hesab edir ki, sərbəst buraxılan keçmiş prezident siyasətə qayıtmaq imkanı əldə edib: “Köçəryan ayın 13-də sərbəst buraxıldı, bu da imkan verir ki, o, Paşinyanın barışmaz tənqidçisi və ən ciddi rəqibi kimi siyasi meydanda öz mövqelərini gücləndirsin. Onun maliyyə imkanlarının və xarici əlaqələrinin geniş olduğunu nəzərə alsaq, yenidən hakimiyyətə gəlmək səylərini artıracağına şübhə yoxdur.

Cəmiyyət tərəfindən dəstəklənməsə də, böyük siyasi güc olan Respublika Partiyası və Daşnaksütyundan dəstək alacağı dəqiqdir. Oliqarx zümrəsi və Moskva da əsas dayaq kimi Köçəryanın arxasındadır”.

Qeyd edək ki, 2008-ci ildə İrəvanda mitinqçilərə qarşı odlu silahdan atəş açmaq əmri verməkdə ittiham olunaraq həbs edilmiş Robert Köçəryan avqustun 13-də sərbəst buraxılıb.

Keçmiş prezidentin həbs edilməsi Rusiyanın kəskin narazılığına səbəb olmuşdu.