“Bu, Paşinyanın sonu ola bilər” – Qiyamçı baş nazir üçün çətin sınaq

Hakimiyyətə gələməyinin 100 günü tamam olan Ermənistanın Baş naziri Nikol Paşinyan bu müddət ərzində uğur qazanaola bilmədi.

Bunu Teleqraf.com-a açıqlamasında politoloq Ramiyə Məmmədova deyib.

Politoloqun sözlərinə görə, Paçinyanın hakimiyyətə gələr-gəlməz Dağlıq Qarabağ münaqişəsi ilə bağlı verdiyi sərt bəyanatlar bölgədə vəziyyəti gərginləşdirdi:

“Digər yandan, Qərbə meyillənən yeni baş nazir Rusiya ilə münasibətləri də gərginləşdirdi. Kremlə yaxınlığı ilə tanına keçmiş prezident Robert Köçəryan və KTMT-nin baş katibi Yuri Xaçaturovun həbsi isə münasibətlərə ən ağır zərbəni vurdu. Üstəgəl, Paşinyanın hakimiyyətə gəlməsi Ermənistanda hökm sürən iqtisadi böhranı bir qədər də dərinləşdirdi. Bu fonda da onun Ermənistanı siyasi qarşıdurmaya sürüklədiyini deyə bilərik.

Lakin buna baxmayaraq , Paşinyanın daxili reytinqi hələ ki yüksəkdir. Ermənilər ona inanırlar və ölkələrini bu çətin vəziyyətdən çıxaracağına böyük ümid bəsləyirlər. Ancaq onun iqtisadi islahatlar həyata keçirmək üçün resursları məhduddur, əngəllər isə çoxdur. O, ilk növbədə Rusiya ilə əlaqələri yoluna qoymaq istəyir ki, daxildə sabitlik yarada bilsin. Əgər Paşinyan parlament seçkilərinə qədər Rusiyanın dəstəyini təmin edə bilməsə, böyük və güclü müxalifətlə üz-üzə qalacaq ki, bu da onun hakimiyyətinə son qoya bilər”.

Ramiyə Məmmədova bildirib ki, Rusiya Ermənistanın nəinki daxili, həm də xarici siyasətini müəyyən edən və ona yardım edə biləcək yeganə dövlətdir:

“Ermənistan hər nə qədər, NATO və Avropa İttifaqına yönəlsə də, Rusiyanın bu yaxınlaşmanı dayandıracaq kifayət qədər siyasi və hərbi təzyiq vasitələri var. Əslində, Paşinyanın anti-Rusiya siyasəti Azərbaycanın lehinə ola bilər. Digər yandan isə Cənubi Qafqazın əsas gücü kimi Azərbaycanla əməkdaşlıq etmək Rusiyanın da maraqlarına uyğundur. Azərbaycan prezidentinin Rusiya səfəri və Xəzərin hüquqi statusuna dair konvensiyanın imzalanması da bunu sübut edir.

Digər yandan da, Rusiya indi Ermənistanla bütün hərbi-siyasi və hərbi-texniki əməkdaşlığı dayandırıb. Bunun da Dağlıq Qarabağ münaqişəsinin obyektiv həllinə təkan verəcəyinə ümid edirik. Azərbaycanın geosiyasi proseslər fonunda Ermənistandan irəlidə olması da, mövcud şəraidə xeyrimizə işləyən əsas amillərdən biridir”.