2 Sentyabr 2018 18:30
1 739

İŞİD terror təşkilatının Suriyanın Palmira şəhərini ələ keçirmək planı deşifrə edilib.

Teleqraf.com xəbər verir ki, Rusiya və Bəşər Əsəd qüvvələri Palmira yaxınlığında yerləşən Əl-Tanf rayonunda İŞİD-in mövqeyini darmadağın ediblər.

Bölgədə baş vermiş silahlı qarşıdurmada 2 terrorçu öldürülüb, 2 nəfəri isə yaralanıb. Məlum olub ki, İŞİD Palmiranı 1 həftəyə ələ keçirməyi planlaşdırıb və bu məqsədlə bölgəyə öz kəşfiyyatçılarını göndərib.

Rəsmi Dəməşqdən verilən açıqlamada bildirilib ki, İŞİD Əl-Tanfda “Şərqin Aslanları” qrupu adı altında 500 militanını yerləşdirib. Terrorçuların ABŞ-ın bölgədəki hərbi bazası yaxınlığında düşərgə salması isə diqqət çəkib.

Dəməşq bunun İŞİD və ABŞ-ın planı olduğunu iddia edir. Yayımlanmış sənəddə militanların ABŞ bazasında yerləşdirilmiş peşəkar hərbçilər olduğu və terrorçuların ABŞ-ın Əl-Tanfdakı bazasından silahlandırıldığı iddia olunur.

Qeyd edək ki, İŞİD-in 2015-ci ildə ələ keçirdiyi Palmira şəhəri 10 ay sonra Suriya və Rusiya Silahlı Qüvvələri tərəfindən geri alınıb. Lakin terror təşkilatı 2016-cı ildə yenidən Palmiranı ələ keçirsə də, Suriya qüvvələri 2017-ci ildə şəhərə nəzarəti yenidən geri qaytara bilib.


Müəllif: Mənsur Rəğbətoğlu
loading...