Rəsmi şəxsdən ziddiyyətli açıqlama: “Urmiya gölü üzrə layihələr dayandırılmayıb”

Urmiya Gölünü Canlandırma Mərkəzinin Qərbi Azərbaycan əyaləti üzrə direktoru Fərhad Sərxoş bundan əvvəlki açıqlamalarının əksinə olaraq gölün canlandırılması üçün nəzərdə tutulan heç bir layihənin dayandırılmadığını bildirib.

Teleqraf.com xəbər verir ki, Fərhad Sərxoş bu barədə “İsna” xəbər agentliyinə danışıb:

“Bu il Urmiya Gölünü Canlandırma Mərkəzi üçün büdcə vəsaiti elan olunmayıb. Buna baxmayaraq bütün layihələr ötən ilin büdcə vəsaiti hesabına icra edilir, heç bir layihənin icrası dayandırılmayıb”.

Mərkəz rəsmisi “Kani sib” bəndinin suyunu Urmiya gölünə axıdan tunelin qazılmasına işarə edərək deyib ki, bu il İnkişaf Fondundan tunel üçün 400 milyard tümən məbləğində vəsait ödənilib. Tuneldə artıq işlərin 63 faizi görülüb və layihənin icrası davam edir.

Fərhad Sərxoş Urmiya gölündə suyun səviyyəsi tarazlığının 1270,27 metr olduğunu diqqətə çatdıraraq tarazlıq səviyyəsinin ötən ilin müvafiq dövrü ilə müqayisədə 2 santimetr artdığını da qeyd edib. O, sentyabrın 28-də gölün sahəsinin 1722 kvadrat kilometr olduğunu deyib.

Ancaq yuxarıda qeyd etdiyimiz kimi Urmiya Gölünü Canlandırma Mərkəzinin rəsmisinin son açıqlaması onun sentyabrın 17-də “Mehr” xəbər agentliyinə verdiyi açıqlama ilə ziddiyyət təşkil edir:

“Bu il ötən ilin müvafiq dövrü ilə müqayisədə Urmiya gölündə suyun səviyyəsi tarazlığı 3 santimetr aşağı düşüb. Suyun həcmi 60 milyon kubmetr azalıb, gölün ümumi sahəsi isə 30 kvadrat kilometr kiçilib”.

Fərhad Sərxoş Canlandırma Mərkəzində vəsait çatışmazlığını kəskin tənqid edərək qeyd etmişdi ki, nə qədər çalışsalar da, bu il Canlandırma Mərkəzinin layihələrinə bir rial belə vəsait ayrılmadı:

“Hava şəraiti ilə əlaqədar artıq iş fəsli başa çatmaq üzrədir. Büdcə vəsaiti olmadığı üçün layihələr icra olunmadı. Əgər ilin ikinci yarısında büdcə vəsaiti ödənilsə də, hava şəraiti ilə əlaqədar layihələri icra etmək mümkün olmayacaq”.

Urmiya Gölünü Canlandırma Mərkəzinin Planlaşdırma və Əlaqələndirmə işləri üzrə müdiri Məsud Təcrişi də sentyabrın 15-də vəsait çatışmazlığını sərt tənqid edərək mərkəzin layihələrin icrası məsələsində geri qaldığını etiraf eləmişdi.

Qeyd edək ki, həyata keçirilən yanlış və qərəzli siyasətin nəticəsində artıq gölün 95 faizi quruyub. Gölün quruması nəticəsində bölgənin ətraf mühitində baş verən dəyişikliklər 15 milyondan çox insanın həyatını təhdid edir.

Bütün bunlara baxmayaraq gölün qurtarılması ilə bağlı hər hansı əməli tədbir həyata keçirməyib.