“Biz danışıqlar aparmaq istəyirik” – İrana girişi qadağan edilmiş BMT rəsmisi

BMT-nin insan hüquqları üzrə xüsusi nümayəndəsi Cavid Rəhman İranla bağlı hesabatını yayımlayıb.

Teleqraf.com xəbər verir ki, o, İran hökumətindən bu ölkəyə girişinə qoyulan qadağanın ləğvini tələb edib.

İranda insan haqları ilə bağlı vəziyyətin ağır olduğunu bildirən pakistanlı hüquq müdafiəçisi bildirib ki, İran hakimiyyəti onun ölkəyə girişi ilə bağlı qadağanı ləğv etməli, İranda insan haqları fəalları və həbsdə saxlanılan siyasi məhbuslarla görüşməsinə şərait yaratmalıdır.

Cavid Rəhman bu barədə İrana rəsmi müraciət ünvanlayacağını diqqətə çatdırıb:

“İranda edamların sayının kəskin artması, söz və ifadə azadlığının məhdudlaşdırılması, qadınların, eləcə də milli və dini azlıqların hüquqlarının kobud şəkildə pozulması, siyasi məhbuslara həbsxanalarda işgəncə verilməsi, siyasi-ictimai azadlıqların məhdudlaşdırılması kimi xoşagəlməz halların baş verməsi, beynəlxalq ictimaiyyəti ciddi narahat edir. Biz isə həmin məsələlər barədə İran rəsmiləri ilə danışıqlar aparmağa çalışırıq”.