ABŞ Rusiyanı cəzalandıracaq – Moskvaya təhdid dolu mesaj

Rusiyalı jurnalist Elizaveta Koroleva “Cavab gözləyin: ABŞ boğazdakı insidentə görə Rusiyanı cəzalandıracaq” başlıqlı məqaləsində rəsmi Moskvanı yeni sanksiyaların gözlədiyini bildirib.

Teleqraf.com-un xəbərinə görə, məqalə müəllifi bunun isbatı kimi ABŞ-ın Avropanı Kerç boğazındakı gərginliklə bağlı Rusiyaya sanksiya tətbiq etməyə çağırdığını xatırladıb.

Qeyd edək ki, ABŞ Dövlət Departamentinin Ukrayna üzrə xüsusi nümayəndəsi Kurt Volker də ABŞ-ın belə bir çağırış etdiyini təsdiqləyib. O qeyd edib ki, ABŞ bu barədə Avropadan olan müttəfiqlərindən konkret mövqe tələb edir.

Bundan əvvəl isə Rusiyanın Avropa İttifaqındakı daimi nümayəndəsi Vladimir Çijov ölkəsinə yeni sanksiyalar tətbiq etmək üçün ABŞ-ın Kerç hadisəsindən bəhanə kimi istifadə edəcəyini açıqlamışdı.

Xatırladaq ki, ötən ay rus hərbçilər Azov dənizində (Kerç boğazı) Ukraynanın döyüş gəmilərinə odlu silahlardan atəş açıb.

Hadisə tərəflər arasında gərginlik yaradıb.