S-400-lərin Türkiyədə yerləşdiriləcəyi tarix açıqlandı

Rusiya istehsalı olan S-400 tipli zenit-raket komplekslərinin (ZRK) Türkiyə ərazisində yerləşdirilməsinə cari ilin oktyabrında başlanılacaq.

Bu barədə Türkiyənin müdafiə naziri Hülusi Akar bəyan edib.

"Zenit-raket komplekslərinin dislokasiya ərazisinə dair qərar Türkiyə Silahlı Qüvvələri Komansanlığı tərəfindən veriləcək", - deyə H.Akar qeyd edib.

Onun sözlərinə görə, məhz Rusiya istehsalı ZRK əldə etmək qərarı ölkənin təhlükəsizliyinin təmin olunması zərurətindən irəli gəlib.

"Türkiyə 82 milyon vətəndaşının müdafiəsini təmin etməyə borcludur", - deyə nazir qeyd edib.

2017-ci ildə Türkiyə və Rusiya arasında S-400 silahlarının alqı-satqısına dair imzalanmış saziş Ankara ilə Vaşinqton arasında gərginliyə səbəb olub.

Martın 2-də Türkiyə nümayəndə heyəti Vaşinqtonda ABŞ-ın “Patriot” hava hücumundan müdafiə sistemlərinin alınması barədə danışıqlara başlamışdı.

Türkiyə XİN başçısı bildirmişdi ki, əgər, NATO və ABŞ-la razılıq əldə olunmasa, Ankara bu silahların Rusiyadan alınması məsələsini gözdən keçirəcək.

/Oxu.az/