Gözlər Ərdoğan-Tramp görüşündə - Masada S-400 müəmması...

Türkiyə Prezidenti Rəcəb Tayyib Ərdoğanın Yaponiyada keçiriləcək G20 zirvə görüşündə amerikalı həmkarı Donald Trampla müzakirə edəcəyi mövzular bəlli olub.

Teleqraf.com xəbər verir ki, tərəflərin müzakirə masasında Rusiyanın təhvil verəcəyi S-400 zenit-raket kompleksi, F-35 proqramı, eləcə də Suriyanın şimalında qurulması planlaşdırılan təhlükəsiz bölgə məsələləri olacaq.

Bir müddətdir Ankara-Vaşinqton arasında gərginliyə səbəb olan S-400 kompleksləri ilə bağlı iki ölkə öz mövqeyini qoruyur. ABŞ Rusiyadan S-400 komplekslərinin alınacağı təqdirdə “Amerikanın əleyhdarlarına qarşı sanksiyalar vasitəsilə müqavimət” – CAATSA-nın dövriyyəyə girəcəyini və əlavə olaraq Türkiyənin ortağı olduğu F-35 proqramından çıxarıla biləcəyini bəyan edib. Ankara isə S-400-ün “bitmiş bir anlaşma” olduğunu açıqlayaraq, geri addım atmayacaqlarını bildirib.

S-400 mövzusunda iki ölkənin ortaq nöqtəyə gəlməsi üçün G20 zirvəsində Ərdoğan-Tramp görüşünün əhəmiyyətinə diqqət çəkilir. Trampın Türkiyəyə nəzərdə tutulan səfərinin reallaşıb-reallaşmayacağı da bu görüşdən sonra bəlli olacaq.