“Fənərbaxça”nın sabiq baş məşqçisi Azərbaycan klubunda - Foto

Məşhur türk futbol mütəxəssisi Mustafa Dənizli Güney Azərbaycanın “Traktor” futbol klubuna baş məşqçi təyin edilib.

Teleqraf.com xəbər verir ki, Təbriz təmsilçisinin sükanı arxasına keçən Dənizli ilə artıq rəsmi müqavilə imzalanıb.

Müqavilənin müddəti bir ildir, lakin 19-cu super liqa yarışları başa çatdıqdan sonra tərəflər arasında razılıqdan asılı olaraq bu müddət uzadıla bilər.

Mustafa Dənizli bu postda şotland baş məşqçi Corc Likenzi əvəz edib.

Yeni baş məşqçinin iyunun 17-də Təbrizə gələcəyi gözlənilir.

70 yaşlı Mustafa Dənizli son olaraq ölkəsində “Kasımpaşa” klubunda çalışıb. O bundan əvvəl Türkiyə milli komandası, “Qalatasaray”, “Beşiktaş” və “Fənərbaxça”, Azərbaycanın “Xəzər Lənkəran”, İranın “Perspolis” və “Tehran Pas” komandalarını çalışdırıb.