“Tramp erməniləri Ağ Evə buraxmır, çünki…” – Politoloqdan şok iddia

“İnqilabdan bir ildən çox vaxt keçməsinə baxmayaraq, ABŞ Ermənistana vəd etdiyi maliyyə və siyasi dəstək vermir. Amerikadakı erməni lobbisinin ciddi səyləri də nəticə vermir, Prezident Tramp erməniləri yaxına buraxmaq istəmir”.

Bunu Teleqraf.com-a politoloq Məhəmməd Əsədullazadə deyib.

Ekspertin fikrincə, Baş nazir Nikol Paşinyanın yürütdüyü siyasət ABŞ-dan çox, Rusiya və İranın maraqlarına uyğundur:

“Con Boltonun İrəvanda səsləndirdiyi fikirlər öz aktuallığını qoruyur, Vaşinqtonun Paşinyandan gözləntiləri özünü doğrultmur. Ermənistan daxilindəki vəziyyətin kövrək olaraq qalması və Ağ Evdən Paşinyana olan soyuq münasibət Ermənistanı ciddi şəkildə narahat edir. Hesab edirəm ki, proseslər belə davam etsə, Paşinyanın siyasi dayaqaları zəifləyəcək. Paşinyan hesab edirdi ki, “demokratik imici” onu ABŞ və Avropadan maliyyə və siyasi yardım almasına imkan yaradacaq. Amma onun bu proqnozu doğrulmadı, ABŞ və Brüssel Paşinyandan qonşu dövlətlərlə isti münasibətlər qurmasını tələb edir. Erməni baş nazir isə bu tələbi yerinə yetirə bilmir.

Buna görə də düşünürəm ki, spiker Ararat Mirzoyan, baş nazirinin müavini Tiqranyan və xarici işlər naziri Zohrab Mnatsakanyanın ABŞ səfərində əsas məqsəd Vaşinqtondan tam siyasi və maliyyə dəstəyi almaq və Qarabağla bağlı mövcud status-kvonun qorunmasına kömək istəmək olacaq. Hesab edirəm ki, Vaşinqton bu məsələlərdən heç birində Paşinyana istədiyi dəstəyi verməyəcək. Çünki Ağ Evin İrəvandan əsas tələbi Qarabağ münaqişəsinin həllini tezləşdirmək və Rusiyanın Ermənistanda mövqeyini zəiflətməkdir”.

Məhəmməd Əsədullazadənin sözlərinə görə, Paşinyan Qarabağ məsələsində konustruktiv addım atmasa, ABŞ-dan dəstək ala bilməyəcək:
“Çünki Vaşinqtonun regionda güclənməsi Qarabağ münaqişəsinin Azərbaycanın ərazi bütövlüyü çərçivəsində həllindən asılıdır. Bir məsələni də qeyd edim ki, ABŞ -dakı erməni lobbisi Ağ Evə yaxın buraxılmır. Bundan istifadə edərək, Donald Tramp administrasiyası ilə daha celbedici əməkdaşlıq qura bilərik. Qənaətimə görə, Trampın hakimiyyəti dönəmində erməni lobbisi ABŞ-Azərbaycan əlaqələrini zəiflədə bilməyəcək. ABŞ-dakı yəhudi lobbisinin Azərbaycanın tərəfində olması da burada rol oynayan əsas amillərdən biridir”.