Dünya üçün qorxunc proqnoz: “Böyük depressiya gəlir” – Xəbərdarlıq

“Koronavirus pandemiyasından ziyan çəkən qlobal iqtisadi fəallığı 2021-ci ilin sonuna qədər tam bərpa etmək mümkün olmayacaq”.

Teleqraf.com xəbər verir ki, bunu Beynəlxalq Valyuta Fondunun (BVF) baş iqtisadçısı Gita Gopinat deyib.

BVF-nin hesablamalarına görə, bu il dünya iqtisadiyyatı 3% kiçiləcək ki, bu da 1930-cu illərin Böyük Depressiyasından bəri ən ağır tənəzzül olacaq.

BVF bundan əvvəl inkişaf etməkdə olan 25 ölkəni pandemiyaya qarşı mübarizəni dəstəkləmək üçün təşkilata olan borclarını ödəməkdən azad edib.

Gopinat qeyd edib ki, fond gələn il dünya iqtisadiyyatının 5.8% artacağını proqnozlaşdırır: “Lakin bu, yalnız qismən bərpa deməkdir. 2021-ci ilin sonuna qədər iqtisadi fəaliyyətin səviyyəsi virusun ortaya çıxmasından əvvəl proqnozlaşdırdığımızdan daha aşağı olacaq”.

Mütəxəssis hesab edir ki, bunun miqyası əvvəlki qlobal maliyyə böhranından daha sürətli və daha böyük olacaq: “Biz daha az maliyyə imkanları olan inkişaf etməkdə olan iqtisadiyyatlardan çox narahatıq. Düşünürəm ki, vəziyyət onlar üçün daha kəskin olacaq”.