Uhanda ağır vəziyyətdə olan sonuncu xəstə də sağaldı

Çinin Uhan şəhərində koronavirus infeksiyası COVID-19-a yoluxmuş və ağır vəziyyətdə olan sonuncu xəstə də müalicə edilərək sağalıb.

Teleqraf.com xəbər verir ki, bu barədə Çinin Səhiyyə məsələləri üzrə Dövlət Komitəsinin rəsmi nümayəndəsi Mi Fen bildirib.

“Xəbər gəldi ki, Uhanda vəziyyəti ağır olan sonuncu koronavirus xəstəsi sağalıb. Bu gün, aprelin 24-də xəstəliyin ağır mərhələsində olan COVID-19 xəstələrinin sayı sıfıra endirildi”, – deyə “RİA Novosti” sitat gətirib.

Bildirilir ki, hazırda Hubey əyalətində COVID-19-a yoluxmuş 47 xəstə qalıb. Onların hamısı Uhan sakinidir.
Son 20 gündə Hubeydə COVID-19-a yoluxma hadisəsi aşkar edilməyib.

Ümumilikdə pandemiya zamanı Uhanda 50 333 nəfər yoluxub, onlardan 3 869 nəfəri vəfat edib.