Kanada İŞİD-ə qarşı koalisiyaya qoşuldu

“Kold Layk (Cold Lae) hərbi bazasından qalxan 6 “CF-18” qırıcı təyyarəsi Küveytə, Trenton hərbi bazasından qalxan 1 “CC-150” tanker təyyarəsi, Greenwood bazasından qalxan 2 “CP-140” Avrora müşahidə təyyarəsi və 1 xüsusi havada yanacaq doldurma təyyarəsi Bəhreynə çatıb”.

Teleqraf.com-un “TRT Haber”ə istinadən məlumatına görə, bunu müvafiq bəyanatında Kanadanın müdafiə naziri Rob Nikolson qeyd edib. Onun sözlərinə görə, Kanada hərbi kontingenti ABŞ rəhbərliyindəki İŞİD-lə mübarizə koalisiyasına qoşulmaq üçün bölgəyə gəlib. Müdafiə naziri Rob Nikolson Kanadadan səmaya qalxan 10 təyyarənin artıq bölgəyə çatdığını bildirib.

Bəyanatında İŞİD-in sadəcə bölgə üçün yox, Kanada üçün də milli təhdid halına gəldiyini bildirən Rob Nikolson kontingentin tərkibindəki 600 hərbçini də cəsarətlərinə görə alqışlayıb. Kanada ordusuna aid hərbi birliklər Bəhreyndəki koalisiya hava əməliyyatı mərkəzindən koordinasiya ediləcək.