17 İyun 21:13
597

“Türkiyə Şuşa bəyannaməsiylə Azərbaycanın tamamını təhlükəsizlik təminatı altına almış oldu”.

Teleqraf.com xəbər verir ki, bunu politoloq Elxan Şahinoğlu deyib.

Ekspertin fikrincə, 100 il bundan əvvəl imzalanan Qars müqaviləsinin genişləndirilməsinə ehtiyacımız var idi:

“Ancaq dəstək qarşılıqlı olmalıdır, müttəfiqlik bunu diktə edir. ABŞ və NATO qüvvələri Əfqanıstanı tərk etməyə hazırlaşırlar. Türkiyə hərbçiləri isə Əfqanıstanda qalacaq və paytaxt Kabilin hava limanını qoruyacaqlar. Türkiyə Prezidenti Rəcəb Tayyib Ərdoğan amerikalı həmkarı Co Baydenlə Brüsseldə son görüşündə deyib ki, Türkiyəyə Əfqanıstanda Pakistan və Macarıstan da dəstək verəcəklər. Türkiyə iki dostu ilə ABŞ və NATO-nu Əfqanıstanda əvəz edəcəklər. Türkiyənin bu addımı ABŞ və NATO tərəfindən yüksək qiymətləndirilib.

Fikrimcə, Azərbaycan da kiçik hərbi kontingentlə Əfqanıstanda Türkiyənin yanında ola bilər. Onsuz da biz Əfqanıstanda varıq. Bu müddəti uzatmaq olar. Bu halda Azərbaycan dost dövlətlər – Türkiyə, Pakistan və Macarıstanın yanında yer almış olacaq və bu hal Vaşinqtonla Brüssel tərəfindən də yüksək qiymətləndiriləcək. Bununla Ermənistan və erməni lobbisi ilə mübarizədə beynəlxalq arenada mövqelərimizi gücləndirmiş olarıq. Əfqanıstanın Azərbaycana dost və qardaş dövlət olduğunu da nəzərə almalıyıq. Müharibə günlərində Azərbaycanın ərazi bütövlüyünü birmənalı dəsətkləyən dövlətlərdən biri də Əfqanıstan idi”.

Elxan Şahinoğlu bildirib ki, Rəcəb Tayyib Ərdoğan Azərbaycan Dövlət Neft Şirkətinin Türkiyə Petrolleri Anonim Şirkətinylə birgə Liviyada enerji rerusrlarının işlənməsində də Bakıya tərəfdaşlıq təklif edib: “Bu da Neft Şirkətinin fəaliyyət çərçivəsini genişləndirmək və Türkiyə ilə birgə hərəkət etmək baxımından faydalı ola bilər”.


Müəllif: Mənsur Rəğbətoğlu