Rusiya hərbçiləri Əsgəranda erməni uşaqlarına təlim keçir - Foto

Rusiya sülhməramlı kontingentinin hərbçiləri Əsgəran rayonunda orta məktəblərin şagirdlərinə “Sülh dərsi” keçiblər.

Teleqraf.com xəbər verir ki, bu barədə Rusiya Müdafiə Nazirliyi məlumat yayıb.

Rusiyanın hərbi yol polisi, humanitar minalardan təmizləmə bölmələri və sülhməramlı kontingentinin yanğından mühafizə üzrə mütəxəssisləri təlimə cəlb edilib.

50-dən çox şagirdə rus hərbçilərinin Qarabağdakı “sülhməramlı missiyasının əsas fəaliyyəti” haqda məlumat verilib.

Minaaxtaranlar rus hərbi mühəndislərinin müasir avadanlıqlar və elektron komponentlərə əsaslanan partlayışın zərərverici amillərindən qorumaq üçün hazırladıqları OVR-2 “Sokol” minatəmizləmə dəstini nümayiş etdiriblər.

Məktəbin həyətində rus minaaxtaranlar erməni uşaqlara ərazinin minalardan təmizlənməsinin necə getdiyini və mina detektorlarının işlərini nümayiş etdiriblər.

Sülhməramlı kontingentin yanğınsöndürmə bölməsinin hərbçiləri uşaqlara yanğınların səbəbləri, yanğınsöndürmə maşınlarının necə işləməsi, təcili xilasetmə texnikası və ekipajın işi haqda məlumat verib, qoruyucu geyim və avadanlıqları göstəriblər.

Hərbi Avtomobil İdarəsinin nümayəndələri uşaqlara yol hərəkəti qaydalarına riayət etməyin vacibliyindən danışıblar.