Çavuşoğlu: "Qarabağın azad edilməsi ilə regionda sülh şansı yarandı"

“Türkiyə bir çox aktual məsələlərdə, o cümlədən Suriya, Liviya və Qarabağdakı vəziyyət üzrə Rusiya ilə fəal təmasdadır. Mövqelərdə fikir ayrılıqları var, lakin tərəflər milli maraqlar çərçivəsində həssas məsələlərin qarşılıqlı şəkildə nəzərə alınması ilə konstruktiv dialoq kursuna sadiqdirlər. Bu, xüsusilə Ukraynaya aiddir”.

Teleqraf.com “Anadolu” agentliyinə istinadən xəbər verir ki, bu fikirləri Türkiyənin xarici işlər naziri Mövlud Çavuşoğlu parlamentin iclasında deyib.

Çavuşoğlu vurğulayıb ki, Krım tatarlarının təhlükəsizliyi və rifahı mövzusunu izləməyə davam edəcək.

Cənubi Qafqazdakı vəziyyətə toxunan XİN rəhbəri qeyd edib ki, regionda dəyişikliklərə ümid var. "Azərbaycanın işğal olunmuş ərazilərinin azad edilməsi ilə region uzunmüddətli sülh üçün tarixi şans əldə etdi", - Türkiyə diplomatiyasının rəhbəri bildirib.

Türkiyə diplomatiyasının rəhbəri daha sonra qeyd edib ki, Ankaranın xarici siyasətinin prioritet istiqamətlərindən biri Mərkəzi Asiya ölkələri ilə qarşılıqlı fəaliyyətdir.