Türk ordusundan uğurlu əməliyyat: PKK-nın qadın lideri zərərsizləşdirildi

Axtarışda olan terrorçular siyahısında qırmızı kateqoriyada yer alan PKK/KCK terror təşkilatının mərkəzi komitəsinin üzvü “Əminə Ərciyəs” ləqəbli Nazlı Taşpınar zərərsizləşdirilib.

Teleqraf.com xəbər verir ki, terror təşkilatının liderlərindən biri olan Taşpınarın Türkiyə Silahlı Qüvvələri və Milli Kəşfiyyat Təşkilatının İraqın Qara bölgəsində keçirdiyi əməliyyatda məhv edildiyi bildirilib.

Nazlı Taşpınar 1994-cü ildə təşkilata qatıldıqdan sonra terrorçuların lideri Abdullah Öcalandan təlim alıb. PKK-da müxtəlif vaxtlarda rəhbər postlarından birini tutub. Türkiyədə terror aktlarının hazırlanmasında iştirak edib. Xüsusilə qadın terrorçuların hazırlanmasında mühüm rol oynayıb. Türkiyədən İraqın şimalına gələn Nazlı Taşpınar bir müddət təşkilatın qadın təşkilatı olan PAJK adlı terror təşkilatına rəhbərlik edib. 2019-cu ildən Qarada olan Taşpınarın Xalq İnqilabi Hərəkatı terror təşkilatının rəhbərlərindən biri idi.