Qırğızıstan nota verdi, Qazaxıstan geri addım atdı – Yeni gəlişmə

Qazaxıstanda saxlanılan və kütləvi iğtişaşların iştirakçısı elan edilən Qırğızıstandan olan caz musiqiçisi Vikram Ruzaxunov azadlığa buraxılıb.

Teleqraf.com xəbər verir ki, cazmenin sərbəst buraxılması ilə bağlı məlumatı Qırğızıstan Milli Təhlükəsizlik Dövlət Komitəsinin mətbuat xidməti də təsdiqləyib.

Musiqiçi gün ərzində vətəninə gətiriləcək.

Bundan əvvəl Qazaxıstan mediası saxlanılan şəxsin 90 min təngə (200 ABŞ dollarından çox) qarşılığında iğtişaşlarda iştirak etdiyini etiraf edən video yayımlayıb. Həmin şəxs işləmək üçün Qırğızıstandan gəldiyini deyib, amma araşdırma zamanı onun Bişkekdə bir caz orkestrinin rəhbəri Ruzaxunov olduğu məlum olub.

Qırğızıstanın Daxili İşlər Nazirliyi musiqiçinin Almatıya qastrol səfərinə gəldiyini bildirib.

Dünən Qırğızıstan məsələ ilə əlaqədar Qazaxıstana nota vermişdi.