"Rusiyaya qarşı sərt qərar: fevralın 10-u..." - London açıqladı

Rusiya ilə Ukrayna arasında böhranın davam etdiyi bir vaxtda Britaniya Moskvaya qarşı sanksiyaları genişləndirməyə hazırlaşır. Böyük Britaniyanın Xarici işlər naziri Liz Truss parlamentdə deyib ki, Rusiya Ukraynaya hücum edərsə, İngiltərədə Rusiyaya qarşı sanksiyaları genişləndirməyə imkan verən qanun fevralın 10-da qüvvəyə minəcək.

Teleqraf.com xəbər verir ki, xarici işlər naziri bu bəyanatını Britaniya parlamentində verib.

Rusiyaya qarşı sanksiyaların indiyə qədərki ən sərt tədbir olacağını bildirən Truss bildirib ki, hazırda hökumət yalnız Rusiyanın Ukraynadakı hərəkətləri ilə birbaşa əlaqəsi olan şəxslərə qarşı sanksiyalar tətbiq edə bilər.

Liz Truss izah edib ki, yeni qanunla daha çox fərdlər və şirkətlər sanksiyaların hədəfi olacaq: “Qüvvəyə minəcək qanun avtomatik olaraq sanksiyalar tətbiq etməyəcək, lakin Rusiya Ukraynaya daha çox müdaxilə edəcəyi təqdirdə tətbiq ediləcək.

Yeni tədbirlər Böyük Britaniyaya ABŞ və digər müttəfiqləri ilə aktivlərin dondurulması və səyahət qadağaları kimi tədbirlərdə əməkdaşlıq etməyə imkan yaradacaq. Kremlin aqressiv və sabitliyi pozan fəaliyyətinə görə məsuliyyəti paylaşanların ağır cavab almasını təmin edəcəyik. Onların Böyük Britaniyadakı aktivləri dondurulacaq. Böyük Britaniyanın heç bir müəssisəsi və ya fiziki şəxsləri onlarla iş görə bilməyəcək. Böyük Britaniyaya girməyə cəhd etsələr, geri qaytarılacaqlar”.

Rusiya isə əlavə sanksiyalar təhlükəsinin əks nəticə verəcəyini və bunun Britaniya şirkətlərinə və səhmdarlarına zərər verəcəyini açıqlayıb. Kremlin sözçüsü Dmitri Peskov bunu “biznesə qarşı ört-basdır edilməmiş hücum” kimi qiymətləndirib və bunun maraqlara əsaslanan cavab tədbirləri ilə nəticələnəcəyini bildirib.