Solçu namizəddən müsəlmanlara dəstək – “Fransa prezidenti seçilsəm...”

“Son vaxtlar Fransada yaşayan müsəlmanlar indiyədək görünməmiş formada təhqir olunurlar”.

Teleqraf.com xəbər verir ki, bunu Fransa prezidentliyinə namizəd Jan-Lük Melenşon deyib.

Solçu namizəd Jan-Lük Meleşon “France 2”-nin suallarını cavablandırıb və ölkədəki müsəlmanları dəstəkləyən açıqlamalar verib.

Melenşon “irqçi qanun” kimi tanınan mübahisəli “Respublika dəyərlərinə hörməti gücləndirən prinsiplər” qanununun parlamentdə müzakirəyə çıxarılmasından bəri ölkədə müsəlmanların ünvanına təhqiramiz ifadələrin artdığına diqqət çəkib.

“Bu gün digər dövrlərdən daha pis olan şey müsəlmanların daima damğalanması və alçaldılmasıdır. Bu, qəbuledilməzdir”, - siyasətçi deyib.

Melenşon bildirib ki, o, prezident seçilərsə, ölkədə azadlıqları məhdudlaşdıran separatçı qanunun ləğvinə çalışacaq.

Melenşon apreldə keçiriləcək prezident seçkilərində yarışacaq.